‘Cezayên disîplînê, êriş û qirkirina siyasî ji heman navendê tên birêvebirin’

Dr. Kamûran Berwarî anî ziman ku bi taybet ji bo êrişên sûîqestê bajarê Silêmaniyê hatiye hilbijartin û got: “YNK bi xwe hedef e. Bi van qetilkirinan dixwazin YNK’ê gunahbar bikin û aramiya Silemaniyê bikin hedef.”

Cîgirê serokê Akademiya Siyaset û Fikra Demokrasiyê ya Başûrê Kurdistanê Dr. Kamûran Berwarî, der barê êrişên li ser Kurdistanê, poltîkayên li Îmraliyê, biryara KCK’ê ya rawestandina bêçalaktiyê ji ANHA’yê re axivî.

YEK KONSEPT

Kamûran Berwarî diyar kir ku li Îmraliyê û Kurdistanê siyaset û qirkirinên ku pêk tên, encama heman konspetê ne û got: “Cezayê disîplînê-qedexeya hevdîtinan li Îmraliyê, êrişên ser Başûr, Şengal, Mexmûr, Herêmên Parastinê yên Medyayê û Rojava, qirkirina siyasî ya li Bakurê Kurdistanê, trafîka dîplomasiyê ya dijberî Kurdan, hemû li ser yek konseptê pêk tên. Navenda doza kurdî di asta navneteweyî, herêmî û cîhanî de serok Ocalan e. Ji ber wê hemû siyasetên xwe destpêkê li ser Îmraliyê didin meşandin.  Ev girêdayî navenda şerê taybet a li ser asta Rojhilata Navîn û cîhanê ne. Di demên pêş de ger ev dewlet siyaseta xwe di ber çavan re derbas nekin dê derbeyeke mezin a aborî bixwin û nikarin xwe li ser pêyan bigirin.”

‘IRAQÊ XWE TESLÎMÎ DEWLETA TIRK KIRIYE’

Dr. Kamûran Berwarî destnîşan kir ku hikumeta Başûrê Kurdistanê û hikumeta Iraqê ji bo dagirkirina Başûrê Kurdistanê û avakirina baregehan rê daye dewleta Tirk û got: “Bê hikumeta Iraqê û hikumeta Başûrê Kurdistanê yek serbazê Tirk nikare ser axa Başûrê Kurdistanê û Iraqê bimîne. Iraqê xwe teslîmî dewleta Tirk kiriye. Li Iraq û Başûrê Kurdistanê zêdetirî 2 hezar û 400 şîrketên dewleta Tirk kar dikin. Bi vê re hemû dahatên Iraqê û bi taybetî jî yên Başûrê Kurdistanê dibin û li welatê xwe belav dikin. Ev şerê niha li ser aboriya Kurdistanê dike.”

‘BAŞÛRÊ KURDISTANÊ Û IRAQ BI TEMAMÎ BÛNE MEYDANA TERORÊ`

Di nava 2 salên dawîn de, li Başûrê Kurdistanê 7 bûyerên terora siyasî bi destê MÎT’a Tirk pêk hatin. 5 ji wan li nav bajarê Silêmaniyê pêk hatin. Lê heta niha tu kesek li ser van bûyeran nehatiye girtin.

Berwarî li ser pirsa me ya ‘ji bo çi Silemaniyê dikin hedef?’ ev bersiv da: “Bajarê Silemaniyê cihekî rewşenbirî, aramî, aştî û demokrasiyê ye. Piraniya kesên daxwaza pênaberiyê kirine, çalakvan, rewşenbîr li Silemaniyê ne. Lê niha hemû bajarên Başûrê Kurdistanê û Iraq bi temamî bûye meydana terorê. Hin peymanên veşartî yên van 4 dewletên Kurdistan dagir kirine ku ev nexşe li cem hinek partî û hêzên kurdistanî jî hene û van planan bi cih tînin. Di planê de têkbirina Tevgera Azadiya Kurdistanê li 4 parçeyên Kurdistanê û bi taybetî jî li Başûrê Kurdistanê heye. Ev jî ji aliyekî ve lawazî û bêçaretiya dewleta Tirk nîşan dide ku nikare beramberî gerîla, gelê Kurd bi ser bikeve. Ji ber wê jî bi rêya sûîkastan rewşenbîr, pêşeng, siyasetmedar, akademîsyen, mirovên bê çek dike hedef. Her wiha bi van êrişan re hewl didin bingeha Osmaniya Nû deynin. YNK bi xwe hedef e. Bi van qetilkirinan dixwazin YNK’ê gunahbar bikin û aramiya Silemaniyê bi xwe armancek e.”

‘AGIRBEST DERFETEK BÛ LÊ DEWLETA TIRK PÊK NEANÎ’

KCK’ê piştî erdheja 6’ê Sibatê bêçalaktiya ku dabû destpêkirin û di hilbijartinê de hatibû dirêjkirin, ji ber êrişên dewleta Tirk a dagirker 13 Hezîranê bi dawî kir. Der barê biryara KCK`ê de Kamûran Berwarî diyar kir ku dewleta Tirk tu carî agirbest pêk neaniye û ev tişt lê zêde kir: “Agirbest gaveke erênî bû. Pêngavek ji bo diyalogê, dan û standinê û çareserkirina pirsgirêka Kurd bû. Her çi qas ev pêngav yekalî bû jî di dem û cihê maqûl de hat dayîn. Zêdetirî 12 agirbestên yekalî ji aliyê PKK’ê ve hatine ragihandin lê tu carî dewleta Tirk ev qebûl nekir. Bidawîkirina agirbestê jî mafekî rewa yê PKK`ê ye. Ji ber ku ji dema agirbestê heya niha êrişî Kurdistanê dikin. Tirkiye gunehbara ku di agirbestê de êrişên xwe dike û rê nade pêşxistina diyalogê. Çawa ku di sala 1984`an de dest bi şer kiribûn, niha jî vegeriyane wê qonaxê. Ev hişmendiya têkbirina gelê Kurd, dê dewleta Tirk li ser nexşeyê nehêle.”

Berwarî xuyan kir ku niha rewşa Rojhilata Navîn, Sûriyê, Tirkiye, Iraq, Îranê ber bi rewşeke xirab û wêrankar ve diçe û ger sînorek û destwerdanek ji aliyê Koalîsyona Navneteweyî ji van dewletan re neyê danîn, dê Rojhilata Navîn bibe goleke xwînê û qonaxa dagirkirina destkeftiyên neteweyî yên gelan dest pê bike. Berwarî da zanîn ku bi taybet dewleta Tirk ji bo vê yekê hikumeta şer ava kiriye.

`DIVÊ KONGREYEKE AWARTE BÊ LIDARXISTIN`

Dr. Kamûran Berwarî diyar kir ku divê gelê Kurd siyaseta xwe ya herêmî, cîhanî û navxweyî di ber çavan re derbas bike û ev tişt lê zêde kir: “Erkeke li ser mileêPKK, KCK, KNK, HDP û partiyên li Kurdistanê ye ku pengavekê ji bo xurtkirina yekitiya neteweyî biavêjin. Hewldan bê dayîn ku kongreyek an jî konferanseke awarte bê lidarxistin, rewşa îro li Kurdistanê di ber çavan re bê derbaskirin, stratejiyeke nû ya yekgirtî li hember vê dagirkeriyê bê dayîn. Her wiha divê gelê me ji her demê zêdetir têkoşîn û berxwedana xwe xurt bike.”

ANHA