​​​​​​​‘Diyaloga bi Rêber Abdullah Ocalan re rêya çareseriyê ye’

Ji 25'ê Adara 2021'an ve agahî ji Rêber Abdullah Ocalan nayê wergirtin. Beriya çend rojan desthilata Tirk qedexeya hevdîtina bi Rêber Abdullah Ocalan re 6 mehên din dirêj kir.

Sekreterê Partiya Roj a Demokratîk a Kurd li Sûriyeyê Kovan Keno cezayê dîsîplînê yê li dijî Rêber Abdullah Ocalan şermezar kir û got: "Ceza beşek ji komployan e ku heta roja me ya îro dewam dikin. Hêzên navneteweyî jî li hember sûc û binpêkirinên dewleta Tirk ên li dijî Rêber Abdullah Ocalan û gelê Kurd bê deng in."

Kovan Keno diyar kir ku di tûra duyemîn a hilbijartinên serokkomariyê yên Tirkiyeyê de ku 28'ê Gulanê hat lidarxistin, serokê AKP'ê Erdogan li Bakurê Kurdistanê deng bi dest nexistin, ji ber vê yekê bi siyaseteke dijminane dixwaze tolê ji gelê Kurd û Rêber Abdullah Ocalan hilîne.

Keno di dewama axaftina xwe de got: "Li şûna bikaranîna tundî, qetilkirin û çewisandinê, divê desthilata Tirk ji bo çareserkirina pirsgirêka Kurd diyalogan bi Rêber Abdullah Ocalan re bike, lê muameleya desthilata Tirk a bi pirsgirêka Kurd û Rêber Abdullah Ocalan re dê aloziya Tirkiyeyê kûrtir bike."

Kovan Keno da zanîn ku rêya çareserkirina aloziyên Rojhilata Navîn û cîhanê girêdayî diyalogên bi Rêber Abdullah Ocalan re ye.

Sekreterê Partiya Roj a Demokratîk a Kurd li Sûriyeyê Kovan Keno di dawiya axaftina xwe de got: "Em wek partiyeke siyasî ya Kurd bi têkoşîna Rêber Abdullah Ocalan serbilind in. Em bi kesayetên welatparêz re ên wekî Qazî Mihemed û Şêx Seîd ku di oxira doza kurdî de berdêlên mezin dan, serbilind in. Em banga rakirina tecrîda girankirî ya li dijî Rêber Abdullah Ocalan dikin."

(bb)                                                                                           

ANHA