​​​​​​​Armanca ciwanan bidestxistina azadiya fîzîkî ya Rêber Abdullah Ocalan e

Qedexeya hevdîtina Rêber Abdullah Ocalan bi malbat û parêzerên wî re ji bo 6 mehên din hat dirêjkirin, ku ji 25'ê Adara 2021'an de tu agahî ji wî nehatine girtin.

'ARMACNA ME YA TEKANE PÊKANÎNA AZADIYA FÎZÎKÎ YA RÊBER APO YE'

Girêdayî vê mijarê, berdevka Yekitiya Jinên Ciwan a Herêma Firatê Firyal Temî destnîşan kir ku bi armanca rêgirtina li ber belavbûna fikrê Rêber Abdullah Ocalan, desthilata Tirkiyeyê tecrîd roj bi roj girantir dike.

Firyal got: "Em ji dewleta Tirk a dagirker re dibêjin ku em dê tu carî nehêlin ew bigihîje armancên xwe û em dê rêya rêberê xwe bişopînin. Armanca me ya tekane pêkanîna azadiya fîzîkî ya Rêber Apo ye."

Endama yekitiyê Mizgîn Silêman jî wiha axivî: "Ji zêdetirî 2 salan ve em rewşa tenduristiyê ya Rêber Apo nizanin. Em dê heta bidawîkirina tecrîdê rêya rêberê xwe bişopînin. Wî ji bo pêkanîna jiyaneke azad û ewle ji bo me azadiya xwe ya fîzîkî feda kir. Ji ber wê jî em ê her bi navê Rêber Apo bang bikin da ku dijmin bizanin ku bi mîlyonan şopdarên fikrê wî hene."

'EW NIKARIN ÎRADEYA ME TÊK BIBIN'

Her wiha, endama yekitiyê Naîle Elî got: "Ev 2 sal in tecrîdeke giran li ser Rêber Abdullah Ocalan tê meşandin ku malbat û parêzerên wî nikarin wî bibînin û li vê dawiyê jî ev qedexeya hevdîtinê hat dirêjkirin. Lê dîsa jî ew nikarin îradeya me têk bibin û me ji rêberê me dûr bixin. Serok ji bo vejandina jinan, têkoşîna xwe dest pê kir ji ber wê jî têkoşîna me jî dê bi armanca bidestxistina azadiya wî ya fîzîkî be."

Endama bi navê Ahîn Etê jî dirêjkirina qedexeya hevdîtinê şermezar kir û banga erêkirina daxwazên hevdîtinê yên malbat û parêzerên Rêber Abdullah Ocalan kir.

(mh/şx)

ANHA