Koçberên Cindirêsê ji QSD û HRE′yê xwestin ku dagirkeran ji Efrînê derxin

Koçberên ji navçeya Cindirêsê ya kantona Efrînê bi çalakiyekê komkujiya şeva Newrozê ya ku çeteyan li Cindirêsê pêk anîbûn, şermezar kir.

Bi sedan koçberên Efrînê bi taybet koçberên Cindirêsê û malbatên 4 şehîdan beşdarî çalakiyê bûn ku li naverasta Fafînê ya Şehbayê hat lidarxistin.

Koçberan şaxên zeytûnê û pankartên "Efrîn azad û dewleta Tirk derkeve derve" û"Dê Efrîn bi fedakariya şehîdan were rizgarkirin" hildan.

Koçberan diruşmên silavkirina berxwedana şêniyên Cindirêsê ya li dijî zilm û destpotiyê û silavkirina fedakariyên şehîdan, şermezarkirina bêdengiya hêzên navneteweyî û sûcên dewleta Tirk berz kirin. Her wiha diruşmên "Cindirêsê ne bi tenê ye" û "Şehîd namirin" berz kirin.

Xwendekara bi navê  Zîlan Seydo bi zimanê kurdî û mamoste Ebîr Hemade bi zimanê erebî daxuyanî xwend.

Di daxuyaniya koçberan de ev tişt hate gotin:

"Ji 5 salan ve dewleta Tirk a dagirker û çeteyên wê Efrînê dagir kiriye. Sûcên revandin, qetilkirin û dizînê yên li dijî niştecihên Efrînê bi dawî nebûne. Piştî erdhejê maska dewleta Tirk û çeteyên wê yên nijadperestiyê kete xwarê û eşkere bûn.

Armanca ji komkujiya ku çeteyên Ehrar El Şerqiye bi desteka MÎTʹê di şeva Newrozê de li Cindirêsê pêk anîbûn ew bû ku meşaleya Newrozê, meşaleya azadiyê vemire û rihê berxwedanê têk bibin, guhertina demgorafîk pêk bînin û herêmên ji niştecihên wê vala bikin. Di encamê de projeyên xwe yên mêtingeriyê pêk bînin û Efrînê bikin navenda terorê û dika pêkanîna sûcan. Lê gelê Efrînê êdî sûcên wan tehemûl nekir, li hemberî hovîtiya wan serî hildan û xwestin ku sûcdar û çete werin darizandin û komên terorîst ji Cindirêsê û Efrînê bi giştî werin derxistin.

Em bang li şêniyên me yên leheng ên Cindirêsê bi taybet Efrînê bi giştî dikin ku hişyar bin, neyên lîstokên îstîxbarata dewleta Tirk, çeteyên wê û ENKS′ê. Ji ber ew hewl didin hovîtiya sûcê sivik bikin û ji rêya wê ya rasteqîn derxin û li gorî armancên xwe yên partiyetê fînanse bikin.

Em bang li NY′yê, rêxistinên hiqûqî û mirovî dikin bi erkên xwe yên mirovî, exlaqî û qanûnî rabin, şêniyên Efrînê ji van komkujiyan biparêzin, ji bo derxistina dewleta Tirk a dagirker û çeteyên wê ji Efrînê bixebitin.

Di dawiyê de em bang li Hêzên Sûriya Demokratîk (QSD), YPJ, YPG û HRE′yê dikin ku Efrînê ji qirêjiya dagirkeran rizgar bikin."

Çalakî bi diruşmên silavkirina Berxwedana Serdemê û berxwedana şêniyên Cindirêsê bi dawî bû.

(fr)

ANHA