​​​​​​​Ciwanên Qamişlo êrişên kîmyewî şermezar kirin û soza tolhildanê da

Hêzên Parastina Gel (HPG) nasnameyên 11 şervanan eşkere kir ku di encama êrişên kîmyewî yên dewleta Tirk a dagirker de şehîd bûne.

Têkildarî vê yekê, bi sedan şêniyên Qamişlo, endamên Tevgera Ciwanên Şoreşger ên Sûriyê, Yekitiya Jinên Ciwan, Meclisa Malbatên Şehîdan, Partiya Yekitiya Demokratîk (PYD), Tevgera Civaka Demokratîk (TEV-DEM) û Kongra Star daketin qadan.

Xwepêşandêran pankartên “Bi rihê Zap, Avaşîn û Metînayê em dê tecrîdê bişkînin û Kurdistana azad misoger bikin” û peykera pêlava gerîla hildan.

Xwepêşandan ji pêşiya çerxerêya Osman Sabrî dest pê kir û ber bi navenda Çand û Hunerê ya Mihemed Şêxo ve bi rê ket, li wir endama Yekitiya Jinên Ciwan a Herêma Cizîrê Ronahî Hisên siyasetên dewleta Tirk a dagirker ên li dijî gerîlayên çiyayên Kurdistanê yên ku îradeya gel temsîl dikin şermezar kir.

Ronahî soza tolhildana şehîdan, bilindkirina asta têkoşînê û şopandina rêya şehîdan heta pêkanîna azadiya fîzîkî ya rêber Ocalan da.

Xwepêşandan bi siloganên “Bijî berxwedana gerîla” û “Bijî berxwdana rêber Ocalan” bi dawî bû.

(mh)

ANHA