​​​​​​​Rojnamevanê ku birîndar bûye kêliyên êrişê vegotin

Dagirkeriya Tirk ji şeva 19-20’ê Mijdarê ve li dijî Bakur û Rojhilatê Sûriyê hemû cureyan êriş dike, ku di encamê de bi dehan welatî li deverên cuda şehîd û birîndar bûn.

Sibeha roja yekşemê nûçegihanê kanala STÊRK TV Mihemed El Ceradê, di dema şopandina encama topbarana dagirkeriya Tirk a li ser nexweşxaneya COVID-19 de, birîndar bû.

Mihemed El Ceradê der barê sedemên topbarana dagirkeriya Tirk wiha axivî: “Dewleta Tirk a dagirker hertim li bihaneyan digere da ku êrişî Kurdan bike. Piştî teqîna Stenbolê jî Kurd hatin tawanbarkirin, da ku êrişekê li dijî Rojava û Başûrê Kurdistanê dest pê bike. Lê belê ev tişt nerast in, teqîna Stenbolê senaryoyeke çêkirî bû ku dagirkeriya Tirk bi armanca xapandina gelê Tirkiyê û qezenckirina dengan di hilbijartinan de amade kiriye.”

El Ceradê wiha domand: “Di şeva 19-20’ê Mijdarê de dagirkeriya Tirk Bakur û Rojhilatê Sûriyê topbaran kir, di encamê de hevalê me yê rojnamevan Îsam Ebdullah li Dêrikê şehîd bû. Di sibeha roja din de me encama topbarana li ser nexweşxaneya COVID-19 dişopand, wê demê ez û 2 hevalên xwe yên di RONAHÎ TV de bi balafirên şer hatin hedefgirtin. Di encamê de ez di serî xwe de birîndar bûn û ji bo dermankirinê em birin nexweşxaneya Kobanê.”

El Ceradê destnîşan kir ku dewleta Tirk a dagirker dixwaze bi rêya hedefgirtina rojnamevanan sûcên xwe yên li dijî Bakur û Rojhilatê Sûriyê veşêre, lê ew dê li ser şopa şehîdên wek Gurbet Alî, Arsûz, Dilîşan û Mistefa ne û dê heta dawiyê şopdarên rêya wan bin.

Di dawiya axaftina xwe de Mihemed El Ceradê got: “Heta em dikarin dê hovîtiya dewleta Tirk a dagirker ji tevahiya cîhanê re teşhîr bikin. Êdî Kurd ne wek berê ne, îro ew xwedî fikrekî ne, yên xwedî fikr jî tu carî têk naçin. Her çiqas wan bikujin û qir bikin lê dîsa jî dê nifşên din dozê bidomînin û welatekî azad bi dest bixin.”

Piştî derbaskirina 24 saetên di çavdêriyê de di nexweşxaneya Kobanê de, rewşa tenduristiyê ya Mihemed El Ceradê baş bû û vegeriya mala xwe.

(mh)

ANHA