​​​​​​​Bi sedan şêniyên Qamişlo cenazeyê şehîd Kamber Soylemez oxir kir

Îro çarşemê bi sedan şêniyên bajarê Qamişlo û nûnerên saziyên sivîl û leşkerî tev li merasîma oxirkirina cenazeyê endamê Tevgera Civaka Demokratîk (TEV-DEM) Kamber Soylemez bûn. Her wiha di heman demê de merasîma xiyabî ji bo şehîdan; endama Meclisa Partiya Jinên Kurdistanê Asma Ararat (Delal Nûrhaq û endama Meclisa Rêveber a Komeleyên Jinên Kurdistanî Gulistan Osman (Zîlan Qamişlo) li goristana şehîd Delîl Saroxan li dar ket.

Di destpêka merasîmê de endama Meclisa Malbatên Şehîdan a Qamişlo, Şemsexan Gulo, dayika şehîd Mihyedîn Gulo hemû şehîdên azadiyê bi bîr anîn û wiha axivî: “Şehîdên me ji bo jiyaneke birûmet û ewle xwe feda kirin. Ev rê, dê her bingeha berxwedana me be, em ê berdêlên herî giranbuha jî feda bikin.”

Şemsexan Gulo wiha domand: “Şoreşa ku wan şehîdan bi xwîna xwe ava kiriye, kes nikare wê têk bibe û me ji rêya me derxîne. Em ê heta dawiyê li ser şopa şehîdên xwe bin.”

Piştre, endama rêveber a Kongra Star a Qamişlo, Zeyneb Murad destnîşan kir ku serkeftina şoreşê bi saya fedakariya şehîdan e û wan şoreş gihand vê astê.

Zeyneb Murad wiha anî ziman: “Em ê heta dawiyê dengê berxwedana me bigihînin cîhanê, îro bi mîlyonan gelê Kurd têkoşîna xwe li ser şopa rêber Abdullah Ocalan li dijî dagirkeriya Tirk didomînin.”

Her wiha, hevseroka Rêxistina Mafên Mirovan a herêma Cizîrê, Evîn Cuma diyar kir ku şehîd Kamber Soylemez endamê Kongra Niştîmanî ya Kurdistanî bû, ji ber wê dewleta Tirk a dagirker ew hedef girt.”

Li dawiyê wesîqeyên şehîdan hatin xwendin û cenazeyê şehîd Kamber Soylemez di nav tilîliyên dayîkan de û silavkirina berxwedana şehîdan li goristanê hat veşartin.

(mh)

ANHA