Jinên herêma Cizîrê: Heya ku êriş hebin dê çalakiyên me jî hebin

Li dijî êrişên dewleta Tirk a dagirker û çeteyên wê rojane li herêmên Bakur û Rojhilatê Sûriyê çalakî tên lidarxistin. Jin di wan çalakiyan de jî rengê xwe nîşan didin. Jinên ku di meşa li dijî dagirkerî, êriş û gefan a li Qamişloyê kom bûbûn helwestên xwe li dijî êrişên dagirkeran nîşan dan.

Hevseroka meclisa navçeya Girkê Legê Ayhan Murad got: “Rojane hevalên me yên jin ji aliyê dewleta Tirk ve tên hedefgirtin. Hem di qada leşkerî û hem jî di qada civakî de hevalên me yên jin dikin hedef. Lê em berxwedana 14’ê Tîrmehê û 19’ê Tîrmehê esas digirin û dibêjin `Berxwedan jiyan e.` Ev hêza me YPJ, serdemeke nû da destpêkirin. Bi hezaran jin parastin û em gihandin vê deme. Ger YPJ nebûya, em îro li vir nediaxivîn. Bi saya wan pêşengan bi hezaran jin ji destê DAIŞ’ê û dagirkeran hatin rizgarkirin.”

‘SÎXUR DÊ YEK BI YEK BÊN GIRTIN’

Ayhan Murad li dijî êrişên dagirkeran bêdengiya hêzên navneteweyî şermezar kir û wiha lê zêde kir: “Hêzên navneteweyî ku qaşo li ser armanca aramiyê ketin welatê me, em dibînin ku ji balafirên dewleta Tirk re bê deng in û pêşî lê nagirin. Wê tu carî nekarin bi wan êrişan îradeya gelên me û bi taybet îradeya jinan bişikînin. Em ê her tim xwedî li şoreşa jinan û fikir û felsefeya azad derkevin. Jixwe QSD`ê bi ragihandina `Operasyona Sondê` mizgînî da me. Êdî yek bi yek van MÎT`an digirin. Bila her kes bizane; her tim xeta xiyanetê û berxwedanê li kêleka hev meşiyane. Lê xeta berxwedanê hertim wê pêş be. Xayîn, Erdogan û komên çeteyan dê tune bibin.”

Ayhan Murad bal kişand ser şahadeta her sê jinên têkoşer; Jiyan Tolhildan, Roj Xabûr û Barîn Botan û got: “Heta kêliya dawî ya Foruma Şoreşa Jinan jî heval Jiyan li gel me bû. Axaftin û tevgera wê hêz dida me. Em ê her tim soza xwe bi şehîdan xwe re nû bikin. Piştî şehîdên me dê bi hezaran çeka wan rakin.”

Endama Hêzên Ewlekariya Hundirîn a Herêma Cizîrê Wetfa Mesor jî got dê dewleta Tirk a dagirker bi van rêbazên êrişan bi ser nekeve û wiha pê de çû: “Dijmin çi qas li ser me zilm û zorê bike, em ê bi berxwedana xwe serkeftinê mîsoger bikin. Heta kêliya jiyana xwe ya dawî ku em û zarokên xwe sax bin, em çeka wan şehîdan li erdê nahêlin. Em ê pişta dewleta Tirk a dagirker bişikînin. Em tu caran bi top û balefirên wan natirsin. Gelê Kurd bi vîn û hêza xwe dê serkeftinê bi dest bixe.”

`MÎSAKÎ MÎLLÎ DÊ JÊ RE XEWN BIMÎNE`

Henîfa Mihemed endama Rêveberiya Komîteya Edaletê ya Jinan a Kantona Qamişloyê jî diyar kir ku piştî têkçûna DAIŞ’ê dewleta Tirk yekser ketiye dewrê û got: “Bi yekitiya hemû jinên li vir, em ê bersiveke tund bidine dewleta Tirk. Wan hevalên me yên ku hatin şehîdxistin, cîhan ji zilma DAIŞ xilas kir. Hetanî êrişên dagirkeran têk bibin û herêmên xwe rizgar bikin, em ê têkoşîna xwe bidomînin. Ew Mîsakî Mîllî ku pê dixwazin Osmaniyan vejînin, dê tu carî nekarin wan xewn û xeyalên xwe pêk bînin.”

Ji rêveberên Kongra Star a Dêrikê Wesfê Murad Mûsa jî destnîşan kir ku wê tu kes nekare vîna jinan têk bibe. Wesfê di berdewama axaftina xwe de got: “Wek jin erka me ye ku em li hember van êrişên balafirên bêmirov bisekinin. Çawa li Kobanê heval Zehra Berkel û van rojên dawiyê jî li ser rêya Qamişloyê li hevalên me bi balafirên xwe yên bêmirov lê xistin û şehîd xistin. Ji ber ku ji hêz û berxwedana jinan ditirsin. Em ê heta dawiyê li ber xwe bidin.”

`HEYA ÊRIŞ HEBIN DÊ ÇALAKIYÊN ME BIDOMIN`

Her wiha endama Kongra Star a Qamişloyê Behye Hesen helwestên tund li dijî êrişên dagirkeran nîşan dan û got: “Em îro bang li dijminê xwînxwar dikin ku tu para xwe ji mirovahiyê negirtiye, bes e êdî ji dagirkerî û zilma te re. Tu bi top û balefiran êrişî me dikî, însanên ku tu wan şehîd dixî, ma gelo êrişî mal û erda te kiriye? Ew çi qasî êrişî me bikin, em ê ew qas bi hêztir bibin. Em dayikên gerîla, şoreşger, şervanên QSD/YPG/YPJ û Asayîşê ne. Em natirsin, em dibêjin êdî bes e ji te re, heyanî ev êrişên te hebin em ê jî di nava çalakiyan de bin.”

ANHA