Êzidiyên li Şehbayê bi çalakiyekê nerazîbûn nîşanî êrişên li ser Şengalê da

Bi dehan endamên saziyan, yekitiyên sivîl û nûnerên partiyên siyasî li kampa Berxwedan a li navçeya Fafînê ya kantona Şehbayê kom bûn.

Beşdaran alên Yekitiya Êzidiyan a Kantona Efrînê ûYekitiya Jinên Êzidî yên Rojava, wêneyên têkoşerên êzidî Zekî Şengalî, Zerdeşt Şengalî, Seîd Hesen û Merwan Bedel yên ku di êrişên dewleta Tirk de şehîd bûne, vekirin.

Çalakî bi deqeyeke rêzgirtin ji bo bîranîna şehîdên têkoşîna azadiyê dest pê kir, piştre hevseroka Yekitiya Êzidiyan a Kantona Efrînê Eyşe Sîdo bombebarana rejîma Tirk ya li ser Şengalê şermezar kir û got: "Ev ne cara yekemîn e ku artêşa Tirk  a dagirker sûcan li dijî welatiyan pêk tîne."

Eyşe Sîdo diyar kir ku piştî çeteyên DAIŞ`ê di qirkirina civaka êzidî de bi bin ket, Tirkiyê planên dagirkerane pêk tîne û hewl dide tola binketina DAIŞ`ê rake,  ji lew re bêserûber Şengalê bombebaran dike û rêveber û welatiyan li wir dike hedef.

Li aliyekî din jî endama Yekitiya Êzidiyan  a Kantona Efrînê Henane Nasiro axivî û êrişa dagirkeriya Tirk a bi balafirên bêmirov a ji dijî erebeya Merwan Bedel û şehîdxistina wî şermezar kir û wê wekî sûcê li dijî mirovahiyê û civaka azad bi nav kir.

Hevseroka Desteya Çand û Hunerê ya Herêma Efrînê Henan Sîdo axivî û wiha got: "Dagirkeriya Tirk hewl dide Mîsaqa Millî zindî bike, ji lewma rojane Şengal û Bakur û Rojhilatê Sûriyê dike hedef û li dijî welatiyan hovîtrîn sûcan dike. Ji wan sûcê li dijî malbata Gulo û li Şengalê jî derheqê hevserokê Rêveberiya Xweser a Şengalê Merwan Bedel."

Henan Sîdo bang li rêxistinên mirovî û hiquqî kir ku bi erka xwe ya mirovî rabin û sûcên dewleta Tirk a dagirker ên li dijî gelê Kurd û civaka êzidî bi taybet bi dawî bikin.

Çalakî bi sloganên "Bijî berxwedana Şengalê û na ji sûcên dagirkeriya Tirk re" bi dawî bû.

(eh)

ANHA