MSD'ê panelek li Minbicê li dar xist

Endamên saziyên sivîl, leşkerî, rewşenbîr, şêx û rûsiyên bajar û gundewarê Minbicê beşdarî panelê bûn ku li xwaringeha Dahiyet El-Nisûr a aliyê rojavayê bajarê hate lidarxistin.

Di panelê de rewşa siyasî ya herêmê û rola rewşnbîran di çareseriya siyasî ya li Sûriyê de hatin nîqaşkirin.

Panel bi deqeyeke rêzgirtin dest pêk kir. Paşê cîgirê serokatiya Desteya Rêveber a MSD'ê Elî Rehmûn rewşa siyasî li Sûriyê û rola MSD'ê di çareserkirina aloziya Sûriyê de şîrove kirin.

Rehmûn got: "MSD'ê hewl dide dosyaya siyasî li ser maseyê deyne, dosaya siyasî ya Sûriyê di qada navneteweyî û herêmî de hatiye pêçandin. Rûsya û rejîm hewl didin mîna Derayê çareseriyên li gorî xwe li herêmê pêk bînin. Dema ku nikarîbûn vê yekê pêk bînin, hewl dan derew û îdiayan belav bikin."

Elî Rehmûn destnîşan kir ku MSD'ê gelek gav ber bi çareseriya siyasî ve avêtin û teqezî bi diyalogên niştimanî di navbera hemû aliyên sûrî de û bi sponseriya navneteweyî dike.

Piştî nirxandina rewşa siyasî, beşdaran jî nêrînên xwe û rêbazên çareserkirina aloziya Sûriyê parve kirin. Beşdaran diyar kirin ku ji ber destwerdanên gelek dewletan, bêyî hebûn û alîkariya dewletên bihêztir, aloziya Sûriyê çareser nabe, her wiha divê tevahî sûrî rola xwe di çareseriya siyasî de bilîzin.

Hevseroka Komîteya Çand û Hunerê ya Minbicê Roz Îshaq rola rewşenbîran û asoyên çareseriya siyasî ya Sûriyê şîrove kir.

Roza Îshaq bal kişand ser rol û helwesta rewşenbîran a heyî û bandora aloziya Sûriyê li çîna rewşenbîran. Her wiha behsa rola wan di yekirina xebat û nêrînên bi armanca çareserkirina aloziya Sûriyê kir.

Beşdaran li ser mijara duyemîn a panelê nêrînên xwe anîn ziman ku diyar kirin ku bi beşdarbûna pêkhateyan çareserkirina aloziya Sûriyê pêkan e.

ANHA