Şêniyên Efrînê sersaxî ji malbata şehîd  Rûmet Cîlo re xwest

Meclisa Malbatên Şehîdan a herêma Efrînê konê sersaxiyê li qada dibistana ajotinê ya li aliyê başûrê Fafînê vegirt. Konê sersaxiyê bi wêneyên rêber Abdullah Ocalan, wêneyên şehîdên Berxwedana Serdemê û alên Melisa Malbatên Şehîdan hat xemilandin.

Bi sedan şêniyên herêma Efrînê berê xwe da konê sersaxiyê û sloganên "Bijî Berxwedana Serdemê û berxwedana gerîlayên li çiyayên Kurdistanê" berz kirin.

Merasîm bi rêzgirtinê dest pê kir, piştre endama Meclisa Malbatên Şehîdan Sureya Hebeş axivî û sersaxî ji malbata şehîd Rûmet Cîlo û tevahiya gelê herêma Efrînê re xwest. Sureya Hebeş da zanîn ku şehîdan bi fedekariya xwe rêya azadiyê ronî kir û li hemberî planên dagirkeran mertal bûn.

Sureya Hebeş îşaret bi planên dewleta Tirk ên dagirkirina çiyayên Kurdistanê kir û wiha dewam kir: "Ji beriya 6 mehan ve dagirkeriya Tirk hewl dide çiyayên Kurdistanê bike, mîna Avaşîn, Zap, Metîna û Heftanîn, lê bi saya berxwedana HPG`ê armancên dagirkeriyê negihîştin serî."

Sureya Hebeş di berdewama axaftina xwe de behsa xiyaneta PDK`ê kir û got: "Li kêleka wan êrişan û bikaranîna çekên kîmyewî li dijî gerîlayan, PDK`ê bi dewleta Tirk a dagirker re tevkar û îxanetê li gelê Kurd dike. Herî dawî jî 5 gerîla di kemîneke PDK’ê şehîd bûbûn.  Têkildarî vê yekê her çiqasî dayikên şehîdan banga radestkirina cenazeyên Serdem û Tolhildan dikin, lê PDK`ê cenazeyan radestî malbatên wan nake."

Sureya Hebeş bal kişand ser gefên dagirkeriya Tirk ên li dijî navçeya Til Rifetê û ev tişt got: "Gefxwarinên dagirkeriya Tirk ên dagirkirina navçeya Til Rifetê, dikeve çarçoveya şerê taybet û hewl dide bi vê yekê berxwedana wan lawaz bike, lê em ê bersiva dewleta Tirk û çeteyan bidin, gavekê jî bi paş naavêjin û dê Efrînê rizgar bikin û vegerin."

Sureya Hebeş di dawiyê de  destnîşan kir ku her çiqasî dewleta Tirk a dagirker li çiyayên Kurdistanê  çekên kîmyewî  bi kar  tîne jî, lê dê planên wan bi saya berxwedan û berdêlên gerîlayan têk biçin.

Piştre endama  Rêveberiya Meclisa navçeya Şêrewa Dilsoz Efrîn piştrast kir ku êrişên dewleta Tirk ên li dijî çiyayên Kurdistanê û bikaranîna çekên  kîmyewî û tevkariya PDK’ê bi dewleta Tirk re, ji bo têkbirina têkoşîna azadiyê ku 40 salî li hember plan û sûcên wan li ber xwe daye.

Endamê Komîteya Perwerdeya Civaka Demokratîk a herêma Efrînê Mihemed Ebdî nasnameya şehîd  Rûmet Cîlo  xwend û radestî malbatê  kir. 

Di dawiyê de beşdaran sloganên "Bijî berxwedana  gerîlayên li çiyayên Kurdistanê  û  şehîd namirin" berz kirin.

(eh)

ANHA