Piştî aramiya çend rojan careke din artêşa Tirk Minbic topbaran kir

Yek ji fermandarên li eniya Hoşeriyê ya bakurê rojhilatê Minbicê Ebû Xelef got: "Vê sibehê artêşa Tirk a dagirker bi hawinan herêm bi dijwarî topbaran kir. Em amade ne di çarçoveya parastina rewa de bersiva her êrişekî bidin."

11 cotmeh, 2021 17:10

KOBANÊ-NÎHAD KERHO

Piştî 10 rojan ji aramiyê careke din artêşa Tirk a dagirker gundewarên bakurê rojhilatê Minbicê bi hawinan topbaran kirin. Êrişên dagirkeriyê li dijî gundên Hoşeriyê û Catê bûn, dûvre gundê Ewn Dadat topbaran kir, lê sivîl birîndar nebûn.

/ar/uploads/files/2021/10/11/163320_aabw-khlf.webp

Girêdayî jinûve topbaranên dijwar ên dagirkeriya Tirk , yek ji fermandarê meydanî yê Tûgaya Şehîd Ednan Ebû Emced a girêdayî Meclisa Leşkerî ya Minbicê yê li eniya Hoşeriyê Ebû Xelef got ew amade ne bersiva êrişên artêşa Tirk a dagirker ên li dijî herêmê bidin.

Ebû Xelef wiha domand: "Vê sibehê malên sivîlan rastî êrişeke dijwar bi hawin û çekên giran hatin, di encamê metisiyek di nava şêniyan de çêkir û neçar bûn ber bi bajêr ve koçber bibin. Ev ne cara yekê ye ku herêm rastî êrişeke mîna vê tê."

Ebû Xelef ev tişt anî ziman: "Em êdî planên dagirkeriya Tirk ên li dijî herêmê dizanin, ew jî jinûve vejandina terorê ye. Da ku tirsê belav bike, mîna çawa li herêmên dagirkirî ji Efrîn, Girê Spî û Serêkaniyê dibe, da ku şêniyn wê koçber bibin, dagir bike û demografiya herêmê biguhere."

Ebû Xelef got, Meclisa Leşkerî ya Minbicê amade ye bersiva her êrişeke li dijî herêmê bide û amade ne sivîlan biparêze.

Li gor bîlançoya Navenda Ragihandinê ya Meclisa Leşkerî ya Minbicê, meha borî artêşa Tirk a dagirker ji baregehên xwe 723 mûşek avêtin gundên bakurê rojhilatê Minbicê ku tê de şênî hene.

(fr)

ANHA