‘Dixwazin bi hedefgirtina sivîlan herêmê vala bikin… Em destûrê nadin vê yekê’

Piştî dagirkirina bajarên Serêkaniyê û Girê Spî ji aliyê artêşa Tirk a dagirker û çeteyên wê ve di 2019`an de, dagirkeran êrişên xwe li dijî gund û bajarên Bakur û Rojhilatê Sûriyê zêde kirin.

Şêniyên kantona Qamişloyê der barê mijarê de helwestên xwe ji ajansa me re parve kirin.

Welatiya bi navê Medya Sedo êrişên dewleta Tirk a dagirker ên li ser Til Temir û Eyn Îsa bi tundî şermezar kirin û got ew ê li dijî êrişên dewleta Tirk têkoşîn û berxwedana xwe bidomînin.

Medya da zanîn ku hêzên navneteweyî li hemberî sûcên dewleta Tirk a qirker bê deng in û wiha axivî: “Ev yek hevkariya hêzên navneteweyî bi dewleta Tirk re nîşan dide. Li Efrîn û Serêkaniyê zarok hatin qetilkirin. Êrişên dewleta Tirk li ser hemû pêkhateyên Bakur û Rojhilatê Sûriyê ne.”

Medya daxuyand ku hêzên navneteweyî behsa mafên mirovan dikin, lê tu mirovahî li cem wan tune ye, ji ber ku zarok û jin li pêş çavên wan tên qetilkirin lê bê deng dimînin. Medya berxwedana şêniyên Eyn Îsayê ya li hember êrişên dewleta Tirk a dagirker silav kir û got: “Em ji wan re dibêjin em bi we re ne. Hêviya me ji gel û şervanê me heye ku ji bo xaka xwe berxwedanê bikin.”

`ÊRIŞ LI PÊŞ ÇAVÊN RÛSYA Û AMERÎKAYÊ PÊK TÊN`

Şaha Seyîd jî da zanîn ku hêzên navneteweyî piştgiriya dewleta Tirk a dagirker ji bo dagirkirina xaka Bakur û Rojhilatê Sûriyê dikin û got: “Daxwaza dewleta Tirk ji gelê Zirgan, Til Temir û Eyn Îsayê çi ye? Bila ji xaka Bakur û Rojhilatê Sûriyê derkeve, rojane bi êrişên wê jin û zarok tên kuştin.”

Şaha diyar kir ku Rûsya û Amerîka dibêjin em li Bakur û Rojhilatê Sûriyê parastina gel ji êrişan dikin, lê êrişên hovane yên dewleta Tirk a dagirker li pêş çavên wan pêk tên û gel ji ber êrişên dewleta Tirk koçber dibe. Şaha got: “Em serkeftinê ji hêzên xwe re dixwazin ku beravaniyê li ber axa Bakur û Rojhilatê Sûriyê dikin.”

‘ARMANCA ÊRIŞAN VALAKIRINA HERÊMÊ YE’

Sozdar Bêzê jî diyar kir ku wêraniya ku ji aliyê dewleta Tirk a qirker ve tê kirin, li pêş çavê hêzên Rûsya û Amerîkayê rû dide û li ser hedefgirtina sivîlan bi destê dewleta Tirk a dagirker da zanîn ku armanc valakirina herêm û gundên Bakur û Rojhilatê Sûriyê ye û wiha dom kir: “Em ê tu carî herêmên xwe li pêş dewleta Tirk û çeteyên wê vala nekin.”

Bêzê destnîşan kir ku gelê Bakur û Rojhilatê Sûriyê bi hemû pêkhateyên xwe re li hember êrişên dewleta Tirk a dagirker li ber xwe didin. Ew jî wek gel amade ne ku li kêleka hêzên xwe parastina welatê xwe ji êrişên hovane yên dewleta Tirk a qirker bikin.

ANHA

<iframe width="560" height="315" src="https://www.youtube.com/embed/KD7pt8BvdPo" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>