Koçberên Efrînê: Bi lêkirina avahiyên mêtîngeriyê dixwazin dîroka me tune bikin

Koçberên Efrînê destnîşan kir ku dewleta Tirk a dagirker û alîgirên wê bi lêkirina avahiyên mêtîngeriyê hewl didin dîroka kantonê ya bi hezarêm salan tune bike û gotin ew ê li hember siyasetên guhertina demografîk bisekinin.

6 îlon, 2021 07:23

ŞEHBA-XANDÎ ELO

Dewleta Tirk a dagirker û çeteyên wê bi piştgiriya komeleyên kuwêtî û qeterê di mehên derbasbûyî de 19 avahiyên mêtîngeriyê li kantona Efrînê ya dagirkirî ava kirin. Bi hezaran yekîne li gundê Baflûn ê navçeya Şera, Şadîra yê navçeya Şêrawa, Qîbarê ku gundekî êzidî ye û girêdayî Efrînê ye, çiyayê Qaziqlî yê li derdora Kefir Sefra, gundên Mehemediyê, Celemê, Dêwa, Xirbet Elûş, Yalanqozê yên girêdayî navçeya Cindirêsê, gundê Avrazê yê navçeya Mabeta, navçeya Şiyê, gundên Xalta û Îska yên navçeya Şêrewa, gundê Meydan Ekbes ê navçeya Raco, gundê Tirindê yê girêdayî bajarê Efrînê avahiyên mêtîngeriyê ava kirine.

Koçberên Efrînê nerazîbûn nîşanî avahiyên mêtîngeriyê nîşan da û piştrast kir ku ev gav bi armanca têkbirina çand û dîroka Efrînê ya kevnar e.

ꞌPÊŞÎ ŞÊNIYÊN EFRÎNÊ BERPIRSÊN QEDEXEKIRINA GUHARTINA DEMOGRAFIYÊ NEꞌ

Têkildarî mijarê koçberê bi navê Welîd Mihemed got: "Dewletên piştgiriya Tirkiyê û çeteyên wê dikin bi rêya avakirina avahiyên mêtîngeriyê li kantona Efrînê hewl dide me dûrî xaka me bixin û hêviya me ya vegerê qut bike, di heman demê de xêr û bêra erda me jî desteser bike."

Mihemed da zanîn ku pêşî şêniyên Efrînê berpirsên qedexekirina avakirina avahiyên mêtîngeriyê ne û wiha dewam kir: "Di serî de em berpirsên guhartina demografiya welatê me ye ku dewleta Tirk û alîgirên wê pêk tînin. Ji ber vê yekê ji me tê xwestin ku sûcên li dijî xaka me têne kirin qedexe û asteng bikin. Divê yên ku îdiaya parastina mafên mirovan dikin li me guhdar bikin û sûcên dewleta Tirk û alîgirên wê rawestînin."

'ARMANC JI AVAKIRINA AVAHOYÊN MÊTÎNGERIYL TÊKBIRINA NASNAMEYA KURDAN Eꞌ

Koçbera bi navê Hacir Silêman anî ziman ku armanc ji avakirina avahiyên mêtîngeriyê têkbirina nasnameya kurdî ya kantonê ye û wiha axaftina xwe dewam kir: "Armanca dewleta Tirk û çeteyên wê ji avakirina avahiyên mêtîngeriyê li kantona Efrînê têkbirina hebûna Kurdan li kantonê ye. Li hemberî vê yekê dewlet û rêxistinên mafên mirovan bê deng in, lê belê bi deh hezaran şêniyên Efrînê li Şehbayê li ber xwe didin û hemû rêyên jiyanê qebûl dikin da ku vegerin ser erda xwe dikin."

Hacer nerazîbûn nîşanî avakirina avahiyên mêtîngeriyê da û wiha pê de çû: "Em wan kiryaran qebûl nakin û em ê rê nedinê jî, ji ber ku em xwediyê erd û heqiyê ne, ev erd û milkê me ye. Em bêdengiya civata navneteweyî ya li hemberî sûcên ku Tirkiyê pêk tîne şermezar dikin. Em ji cîhanê tevdî dipirsin; gelo bi kîjan heqî hûn dibêjin em demokrat in, ma ne hûn in ên ku piştgiriya Tirkiyê di sûcên ku pêk tîne de dikin?"

ꞌAVAKIRINA AVAHOYÊN MÊTÎNGERIYÊ HEDEFGIRTINA ÇANDÊN MEꞌ

Koçberê bi navê Îbrahîm Kinco îşaret bi avakirina avahiyên mêtîngeriyê kir û got, ger destwerdan çênebe dê çanda kevnar bi xeteriya tunekirinê re rû bi rû ye û bi domdarî got: "Avakirina avahiyên mêtîngeriyê bi armanca têkbirina çanda me ya ku vedigere bi hezarên salan, di heman demê de têkbirin û înkarkirina esaleta herêmê ye û hewldana guhartina demgrafiyê ye. Li ser vê yekê ji ber ku çand nasnameya me ye; înkar û têkbirina wê tê wateya înkar, paşguhkirin û dûrxistina me ya ji rastiya me."

Di dawiyê de Kinco bang li şêniyên Efrînê kir ku li dijî van siyasetan têkoşîna xwe berdewam bikin.

(eh)

ANHA