‘Bombebarana li dijî Şengalê binpêkirina serweriya Iraqê ye’

Balafirên dewleta Tirk a dagirker îro sûka kevn a li naverasta Şengalê bombebaran kir. Di encamê de 2 sivîl şehîd bûn, 2 din jî birîndar bûn.

Girêdayî mijarê, endamê Yekitiya Êzidiyên Sûriyê Mehmûd Reşo got ev ne cara yekemîn e ku dewleta Tirk a dagirker êrişî Şengalê dike û wiha domand: “Dewleta Tirk hemwextî salvegera şehadeta Mam Zekî Şengalî di 15’ê Tebaxê de û salvegera komkujiya Koço de êriş kir.”

Reşo diyar kir ku ev êriş hemwextî serdana serokwezîrê Iraqê Mistefa Kazimî pêk hat ku dixwest rewşa herêmê bişopîne. Reşo got: “Dewleta Tirk ji vê êrişê armanc dike şêniyên Şengalê venegerin warên xwe, ewlehî û aramiya li herêmê têk bibe.”

Reşo axaftina xwe wiha domand: “Şêniyên Şengalê li gorî qanûnên navneteweyî xwe bi xwe bi rê ve dibin. Ev êriş li dijî qanûnan e û li dijî serdestiya Iraq û hikumeta navendî ye.”

Reşo ev êriş şermezar kir û bang li hikumeta Iraqê kir ku rê li pêşiya êrişên li dijî erdnîgariya Iraqê bi taybet Şengalê bigire.

Reşo bang li rêxistinên mirovî yên cîhanî, mafên mirovan û Neteweyên Yekbûyî (NY) kir ku van sûcan rawestînin û piştrast kir ku dewleta Tirk armanc dike, komkujiyên li dijî şengaliyan ji nû ve dubare bike û ewlehiya li herêmê têk bibe.

(şx)

ANHA

<iframe width="560" height="315" src="https://www.youtube.com/embed/bOaREHWb4T8" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>