Şêniyên Efrînê şehîd Xelîl Hemo oxir kir

Bi hezaran şêniyên Herêma Efrînê cenazeyê şehîd Xelîl Hemo yê endamê Hêzên Ewlekariya Hundirîn ku di qonaxa duyemîn a Berxwedana Serdemê de şehîd bûbû li Goristana Şehîdên Berxwedana Serdemê ya li gundê Um Hoş a kantona Şehbayê oxir kir.

NÛÇE

2 hezîran, 2021 17:27

ŞEHBA

Bi hezaran şênî li pêş Nexweşxaneya Avrîn a navçeya Fafînê ya kantona Şehbayê kom bûn ku cenazeyê şehîd Xelîl Hemo wergirin. Piştî şêniyan cenaze wergir bi karwaneke bi sedan erebe ber bi Goristana Şehîdên Berxwedana Serdemê ya li gundê Um Hoşê yê Şehbayê ve ketin rê.

Piştî karwan gihaşt goristanê, merasîm bi deqeyeke rêzgirtinê dest pê kir û dûvre endamê Meclisa Malbatên Şehîdan a Herêma Efrînê Abdîn Şêxo axivî û sersaxiya malbata şehîd û tevahî şêniyên Herêma Efrînê xwest.

Şêxo li ser berxwedana dîrokî ya şêniyên Efrînê li herêmên Şehbayê û siyaseta qirêj a ku dewleta Tirk a dagirker û çeteyên wê li herêmê pêk tînin axivî û wiha got: "Dewleta Tirk a dagirker û çeteyên wê li Efrînê demografiya herêmê diguherin, şêniyan şantaj dikin ku koçber bibin, yekîneyên niştecihî li gel gundên Kurd ava dikin û malbatên tirkmen û ereb tê de bi cih dikin."

Şêxo wiha gotina xwe bi dawî kir: "Dê bi qurbanî û fedekariyên şêniyên Herêma Efrînê berxwedan heta rizgarkirina Efrîn û tevahî herêmên dagirkirî yên Sûriyê berdewam bike."

Piştî axaftinan, endamê Komîteya Perwerdeya Civaka Demokratîk (KPC-D) Zeyneb Ebdo wesîqeya şehadetê xwend û radestî malbatê kir.

Merasîm bi tilîliyên dayik û silavkirina berxwedana şehîdan bi dawî bû.

(fr)

ANHA