Şêniyên Minbicê banga eşkerekirina rewşa tenduristî ya rêbertî kir

Şêniyên bajarê Minbicê têkildarî agahiyên ku derbarê rewşa tenduristî ya Rêber Abdullah Ocalan de belav bûne, ji ANHA'yê re axivîn.

Ciwanê bi navê Ehmed El-Cemîlî diyar kir ku duh agahiyên derbarê nebaşbûna rewşa tenduristî ya Rêber Abdullah Ocalan de belav bûn û rewş bi "Ne mirovî, ne qanûnî" bi nav kir.

Cemîlî got, divê tavilê agahî derbarê rewşa rêbertî de werin standin û wiha pê de çû: "Em ciwanên Minbicê li hemberî kiryarên dewletên kapîtalîst ên ku armanc dikin gelên azad kole bike û li hemberî projeya neteweya demokratîk disekinin, bêdeng namînin. Ji bajarê Minbicê yê şehîdan ku bi saya fikirê rêbertî û keda şehîdan ji terora DAIŞ'ê rizgar bûye, em banga eşkerekirina rewşa tenduristî ya Rêber Abdullah Ocalan dikin."

Ehmed El-Cemîlî bang li civaka navneteweyê û rêxistinên mafên mirovan kir ku binpêkirinên dewleta Tirk ên li dijî rêbertî û gelên azadîxwaz rawestînin û rêbertî azad bikin.

Jina bi navê Medîha El-Cuma banga rakirina tecrîda giran a li ser rêbertî û zelalkirina agahiyên derbarê rewşa rêbertî de kir.

Medîha El-Cuma destnîşan kir ku armanca tecrîdê ew e ku rihê mirovahiyê têk bibin û nehêle ku gel azadiya xwe bi dest bixe û wiha got: "Fikir û felsefeya rêbertî li ser bingehê demokrasî, jiyana hevbeş û pêkanîna biratiya gelan e."

Jina bi navê Rabia Bekro jî got, ew jinên Minbicê tecrîda li ser Rêber Abdullah Ocalan şermezar dikin û got:"Rêbertiya rêya jinan a ber bi azadî û demokrasiyê ve ronî kir. Girtina rêbertî girtina azadî, edalet û azadî û serxwebûna jinan e."

Rabia bang li civaka navdewletî û rêxistinên hiqûqî û mirovî kir ku bi lez mudaxele bikin kiryarên dermirovî yên dewleta Tirk rawestînin û rewşa tenduristî ya rêbertî eşkere bikin."

ANHA