Li herêma Cizîrê çalakiyên 8'ê Adarê didomin

Li herêmên Bakur û Rojhilatê Sûriyê çalakiyên bi wesîleya 8'ê Adarê Roja Jinan a Cîhanê didomin.

DÊRIK

Bi diruşmeya "Têkoşîna me misogeriya şoreşa jinê ye" bi dehan endamên Kongreya Star  ji pêşiya navenda meşeke bi erebeyan li dar xist.

Jinan wêneyên şehîdên jin û alên Kongreya Star hilda bûn bi berzkirina diruşmeyên silavkirina berxwedana jina azad di nava kolanên sereke û yên şaxê de geriyan.

 Herî dawî jinan serdana saziyan kirin û 8'ê Adarê li wan pîroz kir.

Jinan kartên bi sembolên Roja Jinan û wêneyên şehîd "Yadê Eqîde, Hevrîn û Zehra" belav kirin.

DÊRBÊSIYÊ

Jinên ciwan ên navçeya Dirbêsiyê bi heman armancê meşek li dar xist.

Meş ji pêşiya Navenda Ciwanên Şoreşger a Sûriyê ya navçeyê dest pê kir. Di meşê de wêneyên rêber Abdullah Ocalan hatin hildan û diruşmeyên silavkirina berxwedana jin hatin berzkirin.

Meş li qada Şehîdan rawestiya û veguherî mîtîngê.

Endama Yekitiya Jinên Ciwan  Cûdî Mîrzo 8'ê Adarê li jinan pîroz kir û got: "Jinên Kurd ji tevahî jinên cîhanê re bûne mînak, xwe di hemû qadên jiyanê de bi rêxistin kirin û mohra wan li Bakur û Rojhilatê Sûriyê heye."

QAMIŞLO

Rêveberiya Baxçeyê Kulîlkên Rojava ya girêdayî Desteya Perwerde û Fêrkirinê ya Herêma Cizîrê pêşangehek wênexêzan bi navê "Şehîd Hevrîn Xelef" vekir.

Rêvebera Baxçeyê Kulîlkên Rojava Ciwana Mihemed diyar kir ku armanca wan a vekirina vê pêşangehê ew e ku bi rêya wêneyan û rengan zarokan fêrî gelek mijaran bikin. Her wiha zarokan kêfxweş bikin.

Pêşangeh dê 3 rojan dewam bike û kardesteyên şagirt û mamosteyan werin pêşandan.

ANHA