'Li gorî qanûna navneteweyî komkujiya li Til Rifetê sûcekî şer e'

Di demên dawîn de êriş û binpêkirinên dewleta Tirk a dagîrker li dijî gelên herêmê zêdetir bûn. Êriş bi taybet li ser navçeya Eyn Îsa, gundên Til Temir û Til Rifetê zêde bûn. Herî dawî li Til Rifetê komkujiyek pêk anî, di encamê de 4 sivîl, di nav de koçbereke ji Efrînê şehîd bûn û 9 sivîl birîndar bûn.

Girêdayî mijarê, hejmareke parêzerên ji bajarê Minbicê nêrînên xwe ji ANHA`yê re parve kirin. Endamê Yekitiya Parêzeran a Minbic û gundewarê wê Ehmed Hac Mehmûd diyar kir ku komkujiya li Til Rifetê dewamkirina çanda dewleta Tirk e ku şêniyên herêmê ji warê wan da koçberkirin û got: “Ew dewleteke mêtînger û faşîst e.”

Hac Mehmûd destnîşan kir ku artêşa Tirk a dagîrker û çeteyên wê sûcdarên şer in û ji bo darizandina wan divê dadgeheke naventeweyî bê avakirin û wiha axaftina xwe dewam kir: “Ji ber ku artêşa Tirk a dagîrker û çeteyên wê gelek binpêkirin li dijî şêniyên Bakur û Rojhilatê Sûriyê pêk anîn û şêniyên herêmê ji ber wê yekê hîna azaran dikişînin.”

Hac Mehmûd di dawiya axaftina xwe de bang li hemû parêzer, hiqûqnasên Bakur û Rojhilatê Sûriyê kir ku destek bin û bi hev re kar bikin da ku rêxistinên hiqûqî û mirovî di nava Rêveberiya Xweser de ava bikin û sûcên ku dewleta Tirk li Bakur û Rojhilatê Sûriyê pêk tîne bigihînin aliyên navneteweyî.

Parêzer Umer Berkel komkuijya ku dewleta Tirk a dagîrker û çeteyên wê li Til Rifetê pêk anîne bi komkujiyeke li dijî mirovahiyê bi nav kir û got: "Êrişên li dijî sivîlên Bakur û Rojhilatê Sûriyê bi çekên hewayî siyaseteke plankirî ji bo valakirina herêmê ji şêniyên wê yên resen e.”

Berkel destnîşan kir ku komkujiya li Til Rifetê ne ya yekemîn e û ne ya dawî ye û got, dewleta Tirk a dagîrker berî niha jî gelek komkujî li herêmê pêk anîn.

Umer Berkel bang li rêxistinên navneteweyî kir ku dijminahî û binpêkirinên dewleta Tirk a ên li dijî sivîlên Bakur û Rojhilatê Sûriyê û guhertina demografîk rawestînin.

Endamê Yekitiya Parêzeran a Minbicê parêzer Mehmûd Nebî jî got, komkujiya li ku dewleta Tirk Til Rifetê pêk aniye li gorî qanûna navneteweyî sûcekî li dijî mirovahiyê ye û diyar kir ku qanûna navneteweyî hedefgirtina sivîlan wekî sûcekî şer dihesibîne û got: “Dewleta Tirk berpirsa sereke ya terorê li herêmê ye.”

Mehmûd Nebî di dawiya axaftina xwe de got, raya giştî û rêxistinên hiqûqî û navneteweyî girêdayî aliyên bi hêz in û edaletê û mafan paşguh dikin.

(cx)

ANHA

<iframe width="560" height="315" src="https://www.youtube.com/embed/gnKFVo8PvzU" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>