Star FM li Bakurê Sûriyê bûye dengê jinan

Radyoya Star FM di 15`ê Kanûna 2017`an de li navçeya Tirbespiyê ya kantona Qamişloyê wek yekemîn radyoya jinan a li Bakur û Rojhilatê Sûriyê, hate vekirin.

Destpêkê 4 rojnamevanên jin dest bi kar kir. Piştre hejmara wan zêde bû û di salên dawîn de gihaşt zêdetirî 20 xebatkaran.

Star FM bernameyên xwe li ser asta herêmên Bakur û Rojhilatê Sûriyê bi 3 zimanên bingehîn ên herêmê; kurdî, erebî û suryanî weşanê dike.

Ji avakerên radyoyê, Lîlav Hesen destnîşan kir ku Star Fm, radyoyek civakî ye û armanc dike ku dengê jinan girêdayî hêviyên wê, pêdiviyên wê yên giştî û derxistina behreyên wê û gihandina dengê wê ji her kesî re.

Star FM bi 3 bernameyan dest bi weşanê kir. Niha 23 bernameyên cihêreng girêdayî hevpeyvîn, bernameya gundê me, jin û jiyan, şev baş, jina ciwan, rojeva jin, jineolojî, pêşbirkên zarokan, çand û huner, destkeftiyên şoreşê û dîroka Kurdistanê diweşîne.

Her wiha Star FM raporên taybet, hevdîtinên siyasî û civakî amade dike û rojê 6 caran bi 3 zimanan nûçeyan diweşîne.

Der barê rola jinan di şoreşa Rojava de Lîlav got: “Di şoreşê de jin ji zinhiyeta mêrdestiyê û gelek kevneşopiyên berê xilas bû. Star FM bala çîneke fireh a civakê kişand û bû yek ji minberên çapemenî yên pêşeng.”

Lîlav di berdewama gotinên xwe de destnîşan kir ku di destpêkê weşanê de gelek astengî rastî wan hatine û wiha domand: “Ji bo xebatên ragihandinê kedeke mezin pêwîst dike. Dema me rapor amade dikirin, gelek astengî li pêşiya me derketin û şênî bi me re nealîkar bûn.”

Girêdayî navarokên bernameyên radyoyê Lîlav ev agahî parve kir: “Star FM li gorî daxwaz û hêviyên guhdarên jin karî navaroka xwe bi pêş bixe.”

Lîlav îşaret pê kir ku guhdar bernameyan pêşniyar dikin. Ev jî îsbat dike ku radyo gihaştiye qonaxeke girîng û bûye hêviya jinan.

`RIHÊ HEVKARIYÊ, SEDEMA PÊŞKETINA RADYOYÊ YE`

Star FM êş û azarên civakê û jinan, nexasim tundiya ku li dijî wan tê kirin bi rêya bernameyên xwe radigihîne. Nûçegihan Delal Cemîl ji 2 salan ve di radyoyê de kar dike û dibêje ku ji bo ragihandina dengê ciwan û jinan radyo bû derfetek.

.

Delal wiha got: “Ji zarokatiya xwe ve min hêvî dikir ku di warê ragihandinê de kar bikim. Bi saya şoreşa 19`ê Tîrmehê anku şoreşa Rojava ya ku bi şoreşa jinan hate naskirin, min xewna xwe pêk anî.”

Mîdye Silêman pêşkêşa bernameyan û nûçegihana Star FM ji 2 sal û nîvan ve li radyoyê kar dike û ev nirxandin kir: “Giyanê hevkariyê û hezkirinê di navbera endamên Star FM’ê de mînak e. Hemû hev temam dikin, heke yek neyê ser kar a din karê wê temam dike. Ev giyan bû sedem ku radyo bi ser bikeve.”

Mîdye di dawiyê de got: “Bi rêya Star FM em hewl didin dengê jinan ji aliyê siyasî, civakî, aborî, çandî û dîplomatîk ve ragihînin.”

(şx)

ANHA

<iframe width="560" height="315" src="https://www.youtube.com/embed/P7vg_Mv3Alw" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>