Şandeyeke xizmetguzariyê ji Reqayê serdana Hecînê kir

Şande ji hevserokê Komîteya Rêveberiya Herêmî û Şaredariyan a Reqayê Ehmed Xidir, hevserokê Şaredariya Gel a Reqayê Ehmed Îbrahîm, hevserokê Gerînendetiya Avê ya Reqayê Salih El-Fewaz û hevserokê Nivîsgeha Xizmetan a Dêrazorê Mumtez El-Hefel pêk hat.

Şandeyê destpêkê serdana Şaredariya Gel a Hecînê kir. Hevserokê şaredariyê Salih El-Selman pêşwaziya mêvanan kir û ew ji projeyên şaredariyê agahdar kirin. Hevserokê Şaredariya Gel a Reqayê Ehmed Îbrahîm diyar kir ku Şaredariya Reqayê amade ye ku piştgiriya pêwîst bide Şaredariya Hecînê.

Piştre şandeyê berê xwe da Kolana 20'an da ku çavdêriya projeya çêkirina rêyan û ronîkirinê bike. Piştre çavdêriya xebatên amadekirina Nexweşxaneya Giştî ya Hecînê kirin ku werşeyên girêdayî şaredariyê di qonaxa yekemîn a projeyê de enqaz rakiribûn û piştre dest bi qonaxa duyemîn a projeyê kiribû û di wê çarçoveyê de dê torên kanalîzasyonê û avê bên amadekirin.

Piştre şandeyê çavdêriya xebatên rastkirina rêyan û rêya giştî ya di navbera Hecîn û Baxozê de ku di Şefa û Siwsê re derbas dibe, kir. Beriya demekê Şaredariya Reqayê gelek treks ji bo piştgiriya projeya Şaredariya Hecînê şandibûn herêmê.

Di dawiya roja yekem a serdanê de hevserokê Komîteya Rêveberiya Herêmî û Şaredariyan a Reqayê Ehmed Xidir hewaldanên Şaredariya Hecînê erênî nirxandin û piştrast kir ku Komîteya Şaredariyan a Reqayê di her demekê de amade ye ku piştgiriyê bide Şaredariya Hecînê da ku rewşa xizmetguzariyê li herêmê baş bibe.

Dê serdana şandeyê sibê jî dewam bike û dê çavdêriya projeyên din ên Şaredariya Hecînê bê kirin û astengiyên li pêş xebatên wan bên nîqaşkirin.

(dm)

ANHA

<iframe width="560" height="315" src="https://www.youtube.com/embed/GqG90pIN6EA" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>