Ji bo şopandinê şandeyek li ser dibistanên herêma Cizîrê digere

Îro 4 hezar û 92 dibistanên li Bakur û Rojhilatê Sûriyê deriyên xwe li pêş 900 hezar xwendekaran ji bo sala xwendinê ya 2020/2021’an vekirin, li gel wê jî tedbîrên xweparastina ji vîrusa koronayê (Covid-19) hatin girtin.

Şandeya Desteya Perwerde û Fêrkirinê ya serdana dibistanên Qamişloyê kiriye, ji hevseroka Desteya Perwerde û Fêrkirinê ya Bakur û Rojhilatê Sûriyê Kewser Doko, hevserokatiya Meclisa Rêveber a herêma Cizîrê Telat Yûnis û Nezîra Gewriyê û hevserokê Desteya Perwerde ya herêma Cizîrê Rohat Xelîl pêk hat.

Ji tedbîrên xweparastina ji vîrusê yên li dibistanan hatine girtin, lixwekirina tevahî xwendekaran a mask û pêkanîna dûrxistina ji hev e.

Sala xwendinê li dibistanan bi perspektîf û şîretên mamosteyan ji xwendekaran re dest pê kir ku divê xwendekar maskan bi kar bînin, dorveger dibistan bên dezenfektekirin û ji hev dûr bin da ku xwe ji vîrusê biparêzin.

Mamosteyê dibistana Şerîf Redî ya Qamişloyê Heval Îsa îşaret bi girtina wan a tedbîran kir û wiha got: "Dema xwendekar derbasî refên xwe dibin, destên wan dezenfekte dikin, maskan li her kesê nekiriye belav dikin û di refê de ji hev bi dûr dixin."

Îsa berdewam kir, ger xwendekar zêde bûn, dê 2 dewaman çêkin, anku saet ji 08:00’an heta bi 12:00’an dewamek û saet ji 13:00’an heta bi 16:00’an dewameke din.

Îsa bang li tevahî malbatên xwendekaran kir ku bi mamosteyan re alîkar bin û zarokên xwe ji bo pabendiya bi tedbîrên xweparastinê şîret bikin.

(sb/fr)

ANHA