‘Armanca sîxurkirina ciwanan derxistina fitneyê ye’

Girêdayî mijara sîxurkirina Tirikiyê ji welatiyên Sûriyê re da ku ajandeyên xwe li Sûriyê pêk bîne û bandorên wê yên nernênî, şêx Adil Ebdulselam ji ANHA`yê re axivî.

Berdevkê şêx û êlên eşîrên Minbicê û şêxê eşîra El-Bosultan Adil Ebdulselam wiha got: "Wekî şêx û serokeşîrên Ereb ên herêmê, van kiryarên ku dewleta Tirk û dijminên Rêveberiya Xweser a Bakur û Rojhilatê Sûriyê ji bo jihevxistina tevna civakî pêk tînin, şermezar dikin."

Şêx Adil Ebdulselam wiha da zanîn: "Kiryarên bi vê rengî bandorê bi ewlehî û îstiqrara herêmê nakin. Ji ber ku haya gelên Bakur û Rojhilatê Sûriyê ji plan û siyasetên li dijî herêmê heye."

Ebdulselam destnîşan kir ku hevgirtina eşîrên Ereb û Rêveberiya Xweser rê li pêşiya bandorkirina ajanên Tirkiyê li herêmê digire.

Şêx Adil Ebdulselam her wiha îşaret bi bikaranîna Tirkiyê ji welatiyên Sûriyê re û şandina wan ji herêmên şer re kir û wiha got: "Erdogan ciwanan dixapîne û wan ji bo şer dişîne Lîbya û Ezerbîcanê. Ev kiryarên xerabkirinê dikevin berjewendiyên Erdogan û hikumet û partiya AKP`ê."

Şêxê eşîre El-Bosultan ku şaxekî qebîleya Begare ye, wiha berdewam kir: "Em wekî şêx û serokeşîrên Ereb ji ciwanên Sûriyê yên ji çeteyan û Tirkiyê re ajantiyê dikin, wiha dibêje: hişyar bin û bi pereyan neyên xepandin. Ji ber ku Erdogan we li gorî berjewendiya xwe ya taybet û berjewendiya hikumeta xwe û partiya xwe bi kar tîne."

Şêx Ebdulselam îşaret bi bûyerên hedefgirtinê yên li Dêrazorê qewimîn, kir. Wekî kuştina şêxên eşîrên Begare û Igêdat û beriya wê jî kuştinê şêxê eşîra Evadîle ya bajarê Reqayê û wiha got: "Armanca van kiryaran têkbirina ewlehî û îstiqrara herêmê û derxistina fitneyê di navbera eşîrên Ereb, pêkhateyên herêmê û Rêveberiya Xweser a Bakur û Rojhilatê Sûriyê de ye."

Her wiha piştrast kir ku eşîrên Ereb ên Bakur û Rojhilatê Sûriyê ji bikaranîna sîxur û ajanan ku berjewendiyên hêzên herêmî û navdewletî û dijminên Rêveberiya Xweser pêk tînin, baldar in.

Şêx Adil Ebdulselam bang li hemû malbatên koçber û ciwanên ku Tirkiye wekî ajan bi kar tîne kir ku vegerin welatê xwe, bi rûmet li ser axa xwe bijîn, parastina xak û gelê xwe bikin û li dijî kiryarên tevlîhevkirina herêmê bisekinin.

(cx)

ANHA

<iframe width="560" height="315" src="https://www.youtube.com/embed/NzR9LY3CWm0" frameborder="0" allow="accelerometer; autoplay; encrypted-media; gyroscope; picture-in-picture" allowfullscreen></iframe>