‘Qutkirina avê li ser Hesekê sûcek li dijî mirovahiyê ye’

Ev zêdetirî 3 hefteyane ku dewleta Tirk a dagirker û çeteyên wê yê berhevkiriyên DAIŞ û El- Nûsra av li ser bajarê Hesekê qut kirine. Di encamê de zêdetirî milyonek kes, ji ber tunebûna avê zehmetiyên mezin dikişînin.

Li gorî çavdêrên rewşa Sûriyê, artêşa Tirk a dagirker avê weke çekekî di şerê xwe de yê li dijî herêmê de bi kar tîne. Ev şer bi destpêkirina kombûna asta herikîna ava Firatê ber bi Sûriyê ve diyar bû. Herî dawî bi rêya rawestandina stasyona Elok, av bi temamî li ser bajêr qut kir.

Hevserokê Yekitiya Rewşenbîran a Minbicê Ehmed El-Yusif got: “Şerê dawî yê ku dewleta Tirk li dijî gelê bajarê Hesekê dike, şerek bi zanabûn e û li dijî mirovahiyê ye. Heta di şerên di navbera dewletan de qanûn hene, lê dewleta Tirk bi qutkirina ava li ser zêdetirî milyonek kesî, li dijî mirovahiyê sûc pêk tîne.

El-Yusif bang li rêxistinên mirovî û navneteweyî kir ku helwesteke bi lez nîşan bidin ji bo ku sûca ku dewleta Tirk pêk tîne rawestînin û avê careke din bigihêje bajarê Hesek û wiha domand: “Av diyariyek ji xwedê ye û mafê hemû mirovahiyê tê de heye.”

El-Yusif di dawiya gotinên xwe de got: “Dewleta Tirk bi vê sûca xwe tevahiya qanûn û pîvanên mirovahiyê binpê dike.”

Rêveberiya Xweser ji bo çareserkirina pirsgirêka avê, projeya kolandina bîrêna Hime pêk aniye û her wiha beriya çend rojan jî av bi rêya projeyê gihaşt taxên bajarê Hesekê. Lê dîsa jî miqadara avê ya ku proje dide têra şêniyan nake.

(şx)

ANHA

<iframe width="560" height="315" src="https://www.youtube.com/embed/VsPtdBTg5SA" frameborder="0" allow="accelerometer; autoplay; encrypted-media; gyroscope; picture-in-picture" allowfullscreen></iframe>