Şêniyên Dirbêsiyê li dijî êrişa li ser Kobanê meşiyan

Li ser banga Meclisa Malbatên Şehîdan a navçeya Dirbêsiyê bi sedan kes li dijî êrişa dewleta Tirk a li ser gundê Helîncê yê Kobanê meşiyan ku di encamê de sê jin şehîd bûn.

Şêniyan wêneyên zarokên xwe yên şehîd, wêneyên têkoşer endama Koordînasyona Kongreya Star a Herêma Firatê Zehra Berkel a di komkujiyê de şehîd bû hildan û diruşmeyên silavkirina berxwedanê jinê û şermezarkirina dewleta Tirk berz kirin.

Meş li ber avahiya şaredariyê rawestiya. Piştî deqeya rêzgirtin endama rêveber a Meclisa Malbatên Şehîdan a Herêma Cizîrê Fatima Hisên şehîdên azadiyê bi bîr anî û got: "Ev ne cara yekemîn e ku dewleta Tirk a dagirker êrişî jinên Kurd dike. Beriya vê Hevrîn Xelef şehîd xistin û niha jî Zehra Berkel şehîd xistin. Dewleta Tirk  hertim ramanê azad û rîadeya jina Kurd azad dike hedef."

Endama Koordînasyona Kongreya Star a kantona Hesekê Evîn Paşo jî hedefkirina malên sivîlan li gundê Helîncê şermezar kir û ev tişt got: "Armanca dewleta Tirk a ji vê topbaranê şikandina vîna jinê ye û îmhakirina nasnameya jina Kurd e ya ku bi salan ji bo azadiya xwe şer dike."

Evîn anî ziman ku êrişa Tirkiyê bi destûra Rûsyayê pêk hat û diyar kir: "Ji ber ku gundê Helîncê nêzî nuqteyeke hêzên Rûsyayê ye. Helwest û bêdengyia Rûsya ya li hemberî vê êrişê tê wateya ku ew jî hevkarê Tirkiyê ye."

Evîn Paşo di dawiya axaftina xwe de soza şopandina rêya şehîdan da û got: "Bila dewleta Tirk a dagirker bizanibe ku em hemû Hevîn û Zehra ne. Em ê rêya wan dewam bikin heta azadiyê pêk bînin."

Çalakî bi diruşmeyên silavkirina berxwedana jina azad û şermezarkirina dewleta Tirk a dagirker bi dawî bû.

ANHA