Tirkiye bi avakirina baregehên leşkerî planên xwe yên dagirkeriya dewam dike

Baregeha leşkerî ya li nêzî gundê Amiriyê yê gundewarên rojavayê Til Temirê yek ji baregehên sereke yên dewleta Tirk e û ya herî mezin li herêmên Bakur û Rojhilatê Sûriyê ye. Çavkaninyekî tekez kir ku zêdetirî 200 komando di hundirê wê baregehê de hene ku piraniya wan efser in.

3 hezîran, 2020 11:12

HESEKÊ- DIYAR EHMED

Dewleta Tirk a dagirker û çeteyên bi navê Artêşa Nîştimanî ya Sûriyê di 9`ê Cotmehê de êrişî herêmên Bakur û Rojhilatê Sûriyê kir û bajarên Girê Spî û Serêkaniyê dagir kirin û gihîşt gundewarên rojavayê Til Temirê.

Li gorî hin çavkaniyan, ji bo berdewamkirina planên dagirkeriyê û guhertina demografiya herêmê, artêşa Tirk piştî dagirkirina van herêman zêdetirî 20 baregehên leşkerî ava kirin.

ANHA`yê baregeha leşkerî ya li nêzî rêya navdewletî M4 li bilindahiya girê li gundê Amiriyê yê başûrê rojavayê navçeya Til Temirê, şopand.

Li gorî çavkaniyekî leşkerî, artêşa Tirk a dagirker ji beriya du mehan ve baregeh ava kiriye. Ji ber firehiya baregehê û alavên leşkerî yên zêde tê de, ji mezintirîn baregehên leşkerî yên li herêma Serêkaniyê tê hesibandin.

Çavkanî destnîşan kir ku cebilxaneya di hundirê baregehê de ji panzêr, erebeyên BMB û hejmareke topavêjên giran, tank û alavên leşkerî yên din pêk tê.

Li gorî çavkanî, di baregehê de zêdetirî 200 leşkerên hêzên komando hene. Tê texmînkirin ku piraniya wan efser in.

Ji bo parastina baregeh û leşkerên Tirk, artêşa Tirk du radarên çavdêrî û şopandinê li wê baregehê danîne ku dirêjahiya xwe zêdetirî 1.5 km ye.

Çavkanî da zanîn ku hejmareke baregehên leşkerî yên girêdayî artêşa Tirk a dagirker li gundewarên rojhilatê Serêkaniyê bi taybetî li gundên Erîşe, Dawûdiyê û Aliyê hene. Ew baregeh wekî nûqteyên bicihbûna artêşa Tirk a dagirker tên hesibandin û ji baregeha li gundê Amiriyê cuda ne.

Çavkanî her wiha daxuyand ku endamên li wê baregehê dimînin, sivîlên herêmê û milkên wan dikin hedef, her wiha agir bi zeviyên şêniyan dixin û bi awayekî domdar guleyan li gundên li hemberî xwe direşînin.

Ji destpêka dagirkirina herêmên Bakur û Rojhilatê Sûriyê di dawiya sala borî de, dewleta Tirk a dagirker milkên sivîlan desteser dike û vediguherîne baregehên leşkerî.

(cx)

ANHA