Jinên rêveber ên Girê Spî têkildarî binpêkirinên artêşa Tirk hişyarî dan

Şêniyên herêmên Bakur û Rojhilatê Sûriyê bi êriş û binpêkirinên artêşa Tirk re rû bi rû ne. Leşkerên artêşa dagirker û çeteyên wê her cure binpêkirinan li dijî jinan didin meşandin. Çavkaniyên ji hundirê bajêr radigihînin ku li Serêkaniyê 30 jin rastî êrişên cinsî yên ji aliyê leşker û çeteyan artêşa Tirk ve hatine.

Li Girê Spî jî çeteyên artêşa Tirk beriya 3 mehan jineke ciwan a ji bajarokê Eyn Erûs ê kantona Girê Spî revand û heta niha çarenûsa wê ne diyar e.

Rêvebera kampa koçberan a li gundê Tilseman ê bakurê Reqayê Fadiya Şerîf got: “Dewleta Tirk bi zanebûn êrişî jinan dike, da ku vîna azad a gelan û vîna jinan bişikîne. Ji ber ku jin di şoreşa Rojava de bi hêz bûn, beşdarî qadên leşkerî, xizmetguzarî û siyasî bûn, rol û mîsyonek lîstin."

Fadiya anî ziman ku çeteyên dewleta Tirk piştî bi îdiayên bêbingeh herêm dargir kirin û heman senaryoya DAIŞ`ê pêk anî.

Ji rêveberên kampa Kongreya Star a Girê Spî Meha Hemed jî got: "Ji ber binpêkirin û kiryarên hêzên dagirker, bi hezaran şênî neçar man ku dev ji gund û bajarên xwe berdin. Li herêmên dagirkirî em li ser keçikan bi tirs bûn, ji ber ku tevlîheviyeke mezin heye."

Meha Hemed di dawiya axaftina xwe de bang li civaka navdewletî û rêxistinên peywendîdar ên parastina mafên jinan kir ku zextê li Tirkiyê bikin û êrişên li dijî jinên li herêmên dagirkirî bisekinînin.

(eh)

ANHA

<iframe width="560" height="315" src="https://www.youtube.com/embed/YH_-qeAvFoQ" frameborder="0" allow="accelerometer; autoplay; encrypted-media; gyroscope; picture-in-picture" allowfullscreen></iframe>