Lavrov: Hejmareke zêde ya çeteyên ji Sûriyê berê xwe didin Lîbyayê

Wezîrê karên derve yê Rûsyayê Sergey Lavrov îro di civîna çapemeniyê de li gel wezîrê karên derve yê Başûrê Sûdanê de wiha got: "Hejmareke mezin ji çekdarên sûrî berê xwe didin Lîbyayê da ku destwerdanê li kar û barên hundirîn ên Lîbyayê bikin. Ev jî binpêkirina biryarên Meclisa Ewlehiyê ye û her wiha li ser vê bingehê me têkilî bi wezîrê karên derve yê Tirkiyê re danî."

Ev daxuyaniyên Lavrov, piştî Konferansa Berlînê bi beşdariya hêzên mezin, dewletên erebî û amadebûna dewleta Tirk a piştevaniya hikumeta El-Wîfaq dike, pêk hatin, her wiha di civînê de li ser agirbesta daîm a li Lîbyayê, pêkanîna qedexekirina şandina çekan, lihevkirin çêbû.

Li aliyekî din jî Navenda Çavdêriya Mafên Mirovan a Sûriyê (SOHR) wiha da zanîn: "Di van demên dawîn de dewleta Tirk zêdetirî 3 hezar û 600 çete bi rê kirin Lîbyayê."

Berdevkê Artêşa Wetenî ya Lîbyayê Ehmed El-Mismarî di civîneke çapemeniyê ya yekşemê de piştrast kir ku dewleta Tirk di veguhastina terorîstan ji Sûriyê da ku li Lîbyayê şer bikin û bi awayekî bilez, berdewam e.

(fr)