Parêzerên Ocalan li dijî cezayên disîplînê serî li Dadgeha Destûrê ya Tirkiyê da

Parêzerên Buroya Hiqûqê ya Sedsalê, li dijî cezayê dawîn ê disîplînê ku li rêber Abdullah Ocalan û girtiyên din ên li Îmraliyê Omer Hayrî Konar, Hamîlî Yildirim û Veysî Aktaş hate birîn û bûye hinceta qedexeya hevdîtinan, di 17'ê Çileya 2020'an de serî li Dadgeha Destûra Bingehîn a Tirkiyê da. Parêzeran destnîşan kir ku mafê darizandina adil a muwekîlên wan hatiye binpêkirin û xwest ku mafên hatine binpêkirin, bên tespîtkirin.

Di serlêdanê de hate destnîşankirin ku hîmê bingehîn ê darizandina adilane xwe gihandina dadgehê ye, lê belê ev maf hatiye hatiye astengkirin.

Di serlêdanê de wiha hate gotin: "Di nav 15 mehan de bi awayekî sîstematîk her carê 3 mehan cezayê dîsiplînê weke qedexeya hevdîtinê hatiye dayîn. Bi dawîbûna dema ceza re careke din ceza hatiye birîn. Di nav 15 mehan de 5 car ceza hatiye birîn. Daxwaza xwegihandina parêzeran a van dosyayan hatiye redkirin û derveyî darizandina dîsiplînê hatiye hiştin. Her pênç ceza jî bi heman hincetî hatine birîn û hatine pêkanîn."

Di dewama serlêdanê de hate diyarkirin ku astengkirina xwegihandina parêzeran a dosyayan “nehiqûqî” ye û mafê wergirtina alîkariya hiqûqî ji holê hatiye rakirin.

Di serlêdanê de her wiha hate bibîrxistin ku ji 7'ê Tebaxa 2019'an ve parêzer nikarin muwekîlê xwe Ocalan bibînin.