Li dijî êrişên artêşa Tirk şêniyên Tebqayê daketin qadan

Li dijî êrişên artêşa Tirk a dagirker ên li ser herêmên Bakur û Rojhilatê Sûriyê, îro Meclisa Malbatên Şehîdan meşeke girseyî li Tebqayê organîze kir.

Meşê ji ber Meclisa Malbatên Şehîdan dest pê kir û ber Goristana Şehîdan ve çû. Bi sedan şêniyên herêma Tebqayê, endamên saziyan û komîteyên Rêveberiya Sivîl a Demokratîk a Tebqayê wêneyên şehîdan û alên Meclisa Malbatên Şehîdan rakirin.

Meş li Goristana Şehîdan rawestiya û li wir li ser navê Meclisa Malbatên Şehîdan Abdulkerîm Îbrahîm daxuyaniyek da û diyar kir ku canfedatiya şehîdan dê vala neçe û dê heta rizgarkirina xaka Sûriyê ji terorîstan têkoşînê berdewam bikin.

Daxuyaniyê êrişên artêşa Tirk ên li ser herêmên Bakur û Rojhilatê Sûriyê ku der heqê sivîlan de qetilkirin û koçberkirin pêk anîn, şermezar kirin. Di heman demê de diyar kirin ku tevî lihevkirina di navbera Amerîka û Rûsya û pabendiya QSD`ê bi hevpeymanê, lê belê artêşa Tirk hêj binpêkirinan pêk tîne.

Daxuyaniyê îşaret bi berdêlên ku QSD`ê di oxira parastin û azadiya gelan de dane, kir û piştrast kir ku li dijî êrişan QSD mafdar e ku parastina xwe bike.

(eh)

ANHA