Têkoşer Abdulhemîdê Hac Derwêş hate oxirkirin

Têkoşer Abdulhemîdê Hac Derwêş, di sala 1930`yî de li gundê Qermanê ya navçeya Dirbêsiyê ya herêma Cizîrê ya Bakurê Sûriyê ji dayîk bûye, di sala 1967`an bû Sekretêrê Partiya Demokratîk a Pêşverû ya Kurd li Sûrî, 60 salan di nava kar û xebata doza kurdî de bû û di 24`ê Cotmehê de koça dawîn kir.

Merasîma oxirkirina sekretêrê giştî li nêzî navenda partiyê ya li taxa Siyahî û bi beşdariya şandeyên Rêveberiya Xweser a Bakur û Rojhilatê Sûriyê, şandeya PYD`ê bi serkêşiya berpirsê têkiliyên diplomatik ê partiyê Salih Mislim, nûnerên partiyên siyasî, kurdî, suryanî, rûspiyên eşîran, êlên kurdî û erebî yên ku ji hemû herêmên Bakurê Sûriyê pêk hat.

Qada merasîmê bi wêneyên têkoşer Abdulhemîsê Hac Derwêş  ku nivîsên"Em soz didin em ê dilsozê nirx û bingehên rêya te bin ey hevalên delal" hate xemilandin.

Hezkerên têkoşer cenazeya Abdulhemîd rakirin û ber bi qada merasîmê ve çûn. Hêzên Ewlekariya Hundirîn parastina qadê kirin.

Dema cenaze gihaşt qadê koma muzîkê peyasek li dar xist û paşê ser giyanê pakrewanan rêz hate girtin.

Di merasîma oxirkirinê de, gelek axaftin hatin vegotin, her wiha peyamên sersaxiyê yên rêxistin, partiyên kurdistanî yên wekî KCK, KNK û PDK hatin xwendin.

Hemû partî û rêxitinan sersaxî ji endam û malbatê re xwestin û soza şopandina rêya doza kurdî dan.

Axavêran bal kişandin ser girîngiya yekîtiya gelê Kurd û yekrêziya li dijî êrişên artêşa Tirk nexasim, li ser Bakur û Rojhilatê Sûriyê.

Her wiha axavêran îşaret bi rola Hemîd Hac Derwêş kirin û gotin, keyasetek siyasî û civakî bû û dîroka kurdî şahidê vê yekê ye.

Paşê kerwanê cenaze ji bajarê Qamişlo ber bi navçeya Dirbêsiyê ve çûn, da ku têkoşer Abdulhemîd li cihê jidayînbûna wî bispêrin axê.

(eh)

ANHA