Bi hezaran şêniyên kantona Hesekê li dijî gefên Tirkiyê meşiyan

Bi hezaran şêniyên navçeya Dirbêsiyê û bajarê Hesekê û gundên girêdayî wê tevî endamên navend û saziyên leşkerî û sivîl ên herêmê li ber parka Şehîd Zevîn kom bûn û wêneyên Rêberê Gelê Kurd Abdullah Ocalan, wêneyên têkoşeran, alên Kongreya Star û PYD`ê rakirin. Her wiha pankartên bi nivîsên bi her du zimanên Kurdî û Ereb Na ji dagirkeriya Tirk re hildan.

Meş ji ber parka Şehîd Zevîn destpê kir û li tevahiya kolanên sereke ya navçeyê ber bi kolana sereke ku dighîne navçeya Serêkaniyê geriya. Şêniyan di meşa xwe de sembolên serkeftinê û dirûşmeyên ku dagirkeriya Tirk şermezar dikin, berxwedana YPG û YPJ`ê silav dikin berz kirin.

Meş di kolana giştî de rawestî û veguherî mitîngê. Di mitîngê de endama rêveber a Kongreya Star Zeyneb Murad axivî û gefên Tirkiyê ji bo dagirkirina herêmê şermezar kir.

Zeyneb destnîşan kir ku xaka tevahiya herêmên Bakur û Rojhilatê Sûriyê bi xwîna şehîdan hate avadan.

Ji aliyê xwe ve bi navê Meclisa Gel a navçeya Dirbêsiyê Meshûc Hec Mensûr got: "Erdogan piştî ku di hilbijartinan de winda kir, vê carê welatê xwe ber bi tehlûkeyê ve dibe. Ew jî bi rêya gefên li dijî herêmên Bakur û Rojhilatê Sûriyê hewl dide aloziya hundirîn derbasî derve bike. Weke gel em şer naxwazin û em aşiqê aştiyê ne. Lê em li hember her gefekê li dijî xaka me bisekinin."

Meş bi berzkirina dirûşmeyên silavkirina berxwedana Rêberê Gelê Kurd Abdullah Ocalan û dilsoziya bi şehîdan re bi dawî bû.

(şx)

ANHA