Şêniyên herêma Firatê mewsima xwe radestî Desteya Aboriyê dikin

Îsal ji ber zêdebûna baranê li herêmên Bakur û Rojhilatê Sûriyê, mewsima ceh û genim dereng hatin rakirin û patozên li herêmê berê xwe da herêmên derveyî Kobanê. Hejmareke mezin ji zeviyên welatiyan, di encama şewatên ji ber pirsgirêka avêtina boçikên cigareyan û pêxistina agir ji aliyê kesên nenas ve, şewitî. 

Piştî ku patosan dest bi çinîna ceh û genim kir, Desteya Aboriyê ya Herêma Firatê hejmareke mezin ji mewsima ceh û genim, di depoyên çandiniyê de pêşwazî dike. Buhayê ceh bi 100 û yê genim jî bi 160 lîreyên Sûriyê tê firotin.

Li Kobanê aşek tenê ji bo wergirtina ceh li pêş Nexweşxaneya Emel heye, ji 25`ê Gulanê ve ew depo rojane 700 ton ceh pêşwazî dike, her wiha 2 depoyên genim jî ji bo komkirina mewsimê li gundê Rovî û navçeya Çelebiyê hene. Ji 1`ê Hezîranê ve dest bi wergirtina genim dike, heta niha her yek ji wan depoyan, rojane derdora 800 ton werdigirin.

Li kantona Girê Spî jî 2 depoyên genim li Eyn Îsa û Sixêrat hene, rojane derdora 700 ton genim werdigirin, ya li Delhliyê jî 600 ton ceh werdigire.

Depoyên li herêma Firatê yên Eyn Îsa, Sixêrat, Çelebî û Rovî zêdetirî 13 hezar ton genim texzîn dike, her wiha amadekarî ji bo depoya genim a herî mezin li Şergragê tê kirin ku ew depo dê 120 hezar ton genim wergire.

Rêveberiyê Komîteya Aborî ya kantona Kobanê Xelîl Şêx Mislim got: "Em amade ne ku hemû mewsimê cotkaran wergirin û di sala pêş de bi nirxê li gorî razîbûna wan bifiroşin."  

(hh-om)

ANHA