Pîrozbahiya YPJ‘ê bi dawî bû

Fermandariya Giştî ya Yekîneyên Parastina jin (YPJ) bi boneya têkbirina DAIŞ’ê li Hola Werzîşê ya li taxa Giwêran a bakurê bajarê Hesekê şahiyek li dar xist.

Di şahiyê de fermandar û şervanên YPJ’e, nûnerên ji Rêveberiya Xweser a Bakur û Rojhilatê Sûriyê, Tevgera Civaka Demokratîk (TEV-DEM), Kongreya Star, partî, rêxistin, saziyên siyasî û yên sivîl ên Bakur û Rojhilatê Sûriyê û bi hezaran şêniyên herêmê amade bûn.

Şahiyê bi deqeyeke rêzgirtinê û toraneke leşkerî ji hêla şervanên YPJ’ê ve dest pê kir. Piştre, daxuyaniya Fermandariya Giştî ya YPJ’ê hate xwendin.

Di şahiyê de Hevseroka Desteya Malbatên Şehîdan a herêma Cizîrê Welîda Botî, endama TEV-DEM‘ê Foza Yûsif, endama Koordînasyona Kongreya Star Dalya Henan, bi navê Yekîtiya Jinên Azad a Şehbayê Mûşîra Hemo, bi navê Jinên Beth Nehrên Zenûbiya Georg, bi navê Yekîneyên Jinên Şengalê (YJŞ) Axîn Şengal axivîn.

Di axaftinên de berxwedana YPJ‘ê hate silavkirin û soza şopandina têkoşînê heta rizgarkirina hemû jinan hate dayîn.

Jinên di meclisên Rêveberiya Xweser û Sivîl a Demokratîk a Bakur û Rojhilatê Sûriyê de belgeyek di şahiyê de xwend. Belge ji aliyê Hevseroka Meclisa Rêveber a Rêveberiya Xweser a Bakur û Rojhilatê Sûriyê Bêrîvan Xalid ve hate xwendin.

Her wiha saziyên sivîl û leşkerî hatin xilatkirin.

Şahî bi gerandina xelekên dîlanan bi dawî bû.

ANAH