Cesûr Amûdê: Me plana Tirkiyê ya avakirina împaratoriya DAIŞ’ê têk bir

HESEKÊ

Bi dehan şêniyên Serêkaniyê yê girêdayî kantona Hesekê herikîn bin konê sersaxiyê yê Reşa Elo. Reşda Elo endamê Hêzên Ewlekariya Hundirîn bû û di 11’ê Adarê vê mehê de di encama krîzekê de şehîd bû. Konê sersaxiyê li pêş malbata şehîd li gundê Dawîdiya Biçûk ê Zirkanê hat vedan.

Di merasîma sersaxiyê de bi dehan endamên sazî û navendên sivîl ên li bajêr, endamên Hêzên Ewlekariya Hundirîn, YPG, YPJ’ê û QSD’ê beşdar bûn.

Di bin konê sersaxiyê de fermandarê QSD’ê Cesûr Amûdê axivî û sersaxiya ji malbata şehîd Reşad Elo û hemû şehîdên azadiyê re xwest. Her wiha Cesûr Amûdê destnîşan kir ku di çend rojên pêş de dê mizgîniyek şadî ji gelên Bakur û Rojhilatê Sûriyê û tevahî cîhanê re bê ragihandin. Mizgînî ew e ku QSD’ê şerê mezintirîn û xetertirîn terorê li Bakur û Rojhilatê Sûriyê kir û têk bir.

Cesûr Amûdê wiha lê zêde kir: "Bila gelê me bizanibe ku ne tenê şerê DAIŞ’ê dihat kirin, lê belê şerê hemû planameyên dagirkeriya Tirk di bin navê DAIŞ’ê de dikir û me plana dagirkerê faşîst a Tirk careke dîtir têk bir."

Di dawiyê de Cesûr Amûdê îşaret pê kir ku dagirkeriya Tirk hewla armanc û xewna avakirina împaratoriya Osmanî li Bakur û Rojhilatê Sûriyê bi rêya çeteyên DAIŞ’ê dikir, lê QSD’ê ew xewn û plan têk bir.

Merasîm bi dirûşmên silavkirina şehîdan û meşandina li ser şopa wan bi dawî bû.

(fr)

ANHA