Li ser biryaraya Efûyê 103 girtî serbest hatin berdan

Rêveberiya Xweser a Bakur û Rojhilatê Sûriyê 103 girtiyên ku demekê bi çeteyan re kar kiribûn lê destê wan di kuştina sivîlan de tine bû, serbest berdan.

NÛÇE

3 adar, 2019 15:56

DÊRAZOR

Li ser bangawaziya rûspiyên Ereb a ji bo serbestberdana ciwanên ku ji aliyê çeteyên DAIŞ‘ê ve hatibûn xapandin û tevlî çeteyan bibûn, Rêveberiya Xweser a Bakur û Rojhilatê Sûriyê bi civîneke çapemeniyê biryara serbestberdana 283 kesên ku destê wan di kuştina welatiyan de tine ye derxist.

Meclisa Sivîl a Dêrazorê ji bo serbestberdana 103 girtiyên ku demekê di nava DAIŞ‘ê de kar kiribûn civînek li bajaroka Siwer a gundewarê Dêrazorê li dar xistin. Rûspiyên êşîreya Egîdat, Begara, malbatên girtiyan endamên Buroya Têkiliyên Giştî, Partiya Pêşerojê ya Sûriyê û Meclisa Gel a Bisêra di civînê de amade bûn.

Di civînê de, Cîgirê Hevserokatiya Meclisa Zagonsaz Xelef El-Esed, endamê Partiya Pêşerojê ya Sûriyê Ehmed El-Casim, Hevseroka Meclisa Gel a Bisêra Şakir Salih bi serokeşîrê Egîdat Cemîl El-Hefel axivîn.

Kesên axivîn spasiya Rêveberiya Xweser a Bakur û Rojhilatê Sûriyê kirin û bang li girtiyan hate kirin ku ji fikrê tindraw dûr bikevin û ji bo avakirina civakeke demokratîk kar bikin.

Di dawiya de girtî radestî malbatên wan hatin kirin.

ANHA