Li Minbicê 43 girtî hatin berdan

MINBIC

Li ser bangewaziyên rûspiyên êlên Ereb ên herêmên Rêveberiya Bakur û Rojhilatê Sûriyê Rêveberiya Xweser a Bakur û Rojhilatê Sûriyê ya biryara serbestberdana 283 girtiyan ji herêmên cuda yên Bakur û Rojhilatê Sûriyê di nav de Minbicê de da.

Li ser wê yekê rûspiyên êlên herêmê û endamên Rêveberiya Sivîl a Demokratîk a Minbicê û gundewarê wê tevî endamên Rêveberiya Xweseriya Demokratîk a Bakur û Rojhilataê Sûriyê civiyan. Civîn ji bo axaftina bi girtiyan re beriya ku serbest werin berdan li avahiya Hêzên Ewlekariya Hundirîn a Minbicê li dar ket.

Civîn bi deqeyek rêzgirtin destpê kir. Piştre bi navên Desteya Rûspiyan a Bakur û Rojhilatê Sûriyê endamê desteyê Şêx Adil Ebdulselam, bi navê Rêveberiya Sivîl a Demokratîk a bajarê Minbic û gundewarê wê hevseroka Meclisa Rêveber Nezîfe Xelo û Rêveberiya Xweser a Bakur û Rojhilatê Sûriyê serokê Desteya Karûbarên Civakî û Xebitandinê Farûq El-Maşî axivîn.

Di axaftinan de bang li girtiyan hate kirin ku layiqî navbeynkariya rûspiyan û însyatîfa ji bo efûyê bin. Her wiha ji girtiyan hate xwestin ku li xwe vegerin û carek din xizmeta dagirker û dijminan nekin berovajî wê xizmeta herêm û civaka xwe bikin.

Girêdayî mijarê rûspiyê êla Benî Esîd, Mihemed Sadiq El-Esîdî spasiya însiyatîfa Rêveberiya Sivîl a Demokratîk a Minbic û gundewarê kir û ji girtiyan xwest ku carek din şaştiyên xwe dubare nekin. El-Esîdî teqez kir ku ev însiyatîf nîşaneya bêhnfirehiyê û bexişandiyê ye.

Girtiyek ku serbest hatiye berdan Eymen Şêxo ji ajansa me re axivî  û teqez kir ku ew nikare hestên xwe kêfxweşiyê bîne ziman, ew gelek kêfxweş e ji ber ku hatiye serbestberdan.  Şêxo spasiya êlên herêmê û Rêveberiya Sivîl a Demokratîk a Minbicê kir û bal kişand ku di dirêjahiya dema ku gitî maye de, têghiştiya şaştiyên ku kirine û ew kiryar bi cahiliyetê wesifand û soz da ku dê kesayeta xwe ji nû ve ava bike da ku sûd li civak û şêniyan bike.

Li gorî kesê ku agahiyan li ser karûbarên girtiyan dizane, diyar kir ku cezayên girtiyên ku serbest hatine berdan di navbera 2 sal û kêmtir de ye, ji ber ku destên wan di rihandina xwîna gelê Sûriyê de tune ne.

(şx)

ANHA