Sadkop hewl dide pêwîstiyên şêniyan dabîn bike

EHMED EL-ESAF / REQA

Saziya Sadkobê di Hezîrana sala borî de şaxa xwe li herêma El-Keramê ya dikeve rojhilatê Reqayê, vekir. Saziyê 16 ruxset pêşkêşî xwediyên stasyonên sotemeniyê kirin.

Her wiha şaxa Sadkopê li herêma El-Keramê li gorî belgeyên ku ji hêla meclisên herêmî û malên gel ên herêmê ve ji şaxa Satkopê re hatine şandin, mazot li 24 hezar û 232 malbatan belav kiriye. Para her malbatekê 200 lître ye û bi buhayê 11 hezar û 500 lîreyên Sûriyê ye.

Bi hevkariya komîteyên çandiniyê yên girêdayî malên gel 120 hezar û 453 lître mazot wek destekekê li cotkaran hatin belavkirin. Ji bo sivikkirina barên aborî li ser şêniyan, şaxê Sadkopê yê El-Keramê mazot ji avahiyên pîşeyî, firin, aş û jeneratoran re peyda kirin.

Di heman demê de Sadkopê zêdetirî 6 hezar û 500 cer mehane bi bi buhayê 2 hezar û 700 lîreyên Sûriyê belav kiriye.

Endamê rêveber ê şaxa Sadkopê yê El-Keramê Xelîl El-Ewad diyar kir ku wan bi hevkariya meclisên herêmî û malên gel xebateke hêja meşand û wiha got: “Meclisên herêmî û malên gel serjimariya şêniyan, cotkaran û rûberên zeviyan amade kirin.”

El-Ewad tekez kir ku Sadkop dê di demên pêş de hewl bide plansaziyekê deyne da ku tevahiya pêwîstiyên stasyonên ku ruxset girtine, bîne cih.

(şx/bm)

ANHA