Li Reqayê pirsgirêkên avê tên çareserkirin

Şaredariya Gel a Reqayê dest bi xebatên li ser projeya kanalîzasyonê ya taxa El-Muxtelîta ya bi dirêjiya 600 metre kir. Her wiha ekîbên sererastkirinê li taxa Rimêla dixebitin.

NÛÇE

17 sibat, 2019 13:54

REQA

Piştî rizgarkirina bajarê Reqayê ji çeteyên DAIŞ`ê, werşeyên (ekîb) komîteya xizmetguzariyê di Şaredariya Gel de dest bi pêkanîna gelek projeyên xizmetguzariyê kir. Di nav de projeyên rêyan, kanalîzasyonê û sererastkirina dibistanan hene. Ev projeyên nû jî bi armanca jiyan ji nû ve li bajêr geş bibe û xizmetê ji şêniyan re bikin, hatine danîn.

Şêniyên taxa El-Muxtelîta bi van pêngavan keyfxweş in.

Şaredariya Gel a Reqayê soz da şêniyên taxa Rimêla di nava planên xwe yên pêşerojê de şebekeyan sererast bike û şebekeyên avê bi yên nû biguherîne.

Werşeyên sererastkirinê li aliyê başûrê taxa Rimêla şebekeyên ava vexwarinê sererast kirin û bi yên mezin re guherandin. Her wiha kanalên ava baranê tên çêkirin. Kanalên zirar jî dîtine bi çîmentoyê sererast dikin.

Berpirsê projeyê Mehmûd Meter ji ajansa me re axivî û wiha got: "Me dest bi kar kir, em boriyên şikestî û yên ku zirar dîtine diguherin. Piştî hefteyê ji bidawîkirina kar em ê dest bi sererastkirina xetê bikin. Em xeta ava vexwarinê ya taxa Rimêla sererast dikin û dê heta 2 hefteyên din bi dawî bibe."

Şaredariya Gel a Reqayê tevî derfetên kêm, di sererastkirin û ji nû ve çêkirina binesaziya bajêr de xebatên xwe dewam dike.

(jo/bm)

ANHA