Cenazeyê şehîd Dilo Hesekê bi merasîmekî girseyî hate veşartin

Bi sedan şêniyên navçeya Amûdê cenazeyê şervanê YPG`ê Dilo Hesekê ku di pêngava "Şerê Tinekirina Terorê" de şehîd bûbû, spartin axê.

NÛÇE

11 sibat, 2019 14:22

QAMIŞLO

Bi sedan şêniyên navçeya Amûdê cenazeyê şervanê YPG`ê Dilbirîn Hac Yûnis (Dilo Hesekê) ku di 6`ê Sibatê de di qonaxa dawîn a Pêngava Bagera Cizîrê ya Şerê Tinekirina Terorê şehîd bûbû ji pêşiya navenda Meclisa Malbatên Şehîdan wergirtin û bi kerwanekî ber bi Goristana Şehîd Îsmaîl a navçeyê ve bi rê ketin.

Li goristana deqeyeke rêz hate girtin û ji aliyê şervanên YPJ û YPG‘ê ve merasîma leşkerî pêk hat.

Bi navê Meclisa Malbatên Şehîdan a Navçeya Amûdê Mihemed Seîd Ferso û bi navê fermandariya YPG`ê Agirî Jînda axaftin hatin kirin. Di axaftinan de sersaxî ji malbata şehîd Dilo Hesekê re xwestin.

Kesên axivîn diyar kirin ku şehîd Dilo Hesekê ji bo parastina destkeftiyan, azadî û rûmeta gelê xwe canê xwe feda kir û wiha gotin:"Şehîd Dilo bû stêrkek li esîmanê me da ku rêya me ronî bike."

Paşê hevseroka Meclisa navçeya Amûdê Selwa Silêman nasnameya şehîd Dilo Hesekê xwend û radestî malbatê kir.

Cenazeyê şehîd Dilo Hesekê di nav diruşme û têlîliyên dayikan şehîd hat veşartin.

(jo)

ANHA