Şehîda YPJ‘ê Hêvîdar Azadî li Qamişlo hat veşartin

QAMIŞLO

Bi sedan şêniyên bajarê Qamişlo, tevlî hêzên leşkerî û endamên sazaiyên sivîl û nûnerên partiyên siyasî cenazeyê şervana YPJ`ê Yadhan Mistefa (Hêvîdar Azadî) ya di Pêngava Bagera Cizîrê de şehîd bibû li goristana Şehîd Delîl Saroxan a bajarê Qamişlo oxir kir.

Li goristanê, merasîma leşkerî ji aliyê şervanên YPJ û YPG‘ê ve hate lidarxistin. Paşê axaftin hatin kirin. Bi navê Meclisa Malbatên Şehîdan a bajarê Qamişlo Fatima El-Casim, ji fermandarên YPJ‘ Dilar Qamişlo û bi navê Rêveberiya Xweser a Herêma Cizîrê Hevserokê Desteya Şûnwaran Hisên El-Elî axivîn.

Qisekeran sersaxî ji malbata şehîd Hêvîdar Azadî û şervanên YPG-YPJ`ê re xwestin û diyar kirin ku goristanên şehîdan cenazeyên şehîdên ku ji bo parastina xaka welat canê xwe fedakirine hemêz dikin.

Di axaftinan de hate destnîşankirin ku gelê herêmê ji bo rizgarkirina gel û xak berdêlên buha daye. Çeteyên DAIŞ`ê li ser gel û tevahiya cîhanê xeteriyek bûn û niha bi saya têkoşîn û berxwedana QSD`ê ew di bargeha dawîn de nefesên xwe yên dawîn distînin.

Bavê şehîd Hêvîdar Azadî, Mistefa Henan spasiya tevahiya kesên ku di merasîmê de amade bûne kir û got: "Şehîd Hêvîdar ne şehîda yekemîn e û ne jî bibe ya dawîn. Em şopdarên riyên şehîdan in."

Piştî bi dawîbûna axaftinan endama Meclisa Malbatên Şehîdan a bajarê Qamişlo Revîn Şêxmûs wesîqeya şehadetê xwend û radestî malbata şehîd kir.

Di dawiya merasîmê de girseya gel cenazeyê şehîd Hêvîdar Azadî li goristana Şehîd Saroxan spartin axê.

(şx)

ANHA