Komîteya Enerjiyê ya Reqayê xebatên xwe didomîne

IMAR EL-XELEF / REQA

Çeteyan hemû odeyên birêxistinkirina stasyonan û jeneratorên kehrebeyê yên Reqayê û gundên wê xerab kirin. Her wiha gelek amûrên wê jî dizîn û firotin.

Ji stasyonên girîng ku ji kar hatin rawestandin, stasyona Reqa 1, Reqa 2, Reqa 3, Reqa 4, her wiha stasyona Firosiyê û Reqa 2 bi tevahî hatin rûxandin. Ji ber vê yekê Komîteya Enerjî û Peywendiyan xebatên sererastkirinê didomîne.

Destpêka kar û xebata komîteyê li gundewarên bajêr bû, di 3 mehan de werşeyên sererastkirinê kehrebeya hemû gundên rojavayê bajêr çêkir. Her wiha werşeyên sererastkirinê stasyona Reqa 2 a li ser aliyê duyemîn li çemê Firatê ku kehrebeyê dide hemû gundên başûr, bi dirêjiya 70 km, sererast kir.

Piştî kar û xebata ji aliyê Komîteya Enerjî û Peywendiyan li gundên rojhilatê Reqayê, kehrebeya wan jî hate sererastkirin û gund ronî bû.

Komîteyê niha lez daye xebatên xwe da ku kehrebe bigihîje hemû gund û taxên mayî.

Ji aliyekî din ve jî, Komîteya Enerjiyê û Peywendiyan bi hevkariya Şaredariya Gel a Reqayê xebat meşand û hemû kolanên bajêr ronî kirin. Ji pira kevn a Reqayê heta Çerxerêya Saetê û nexweşxaneya zarokan bi dirêjiya 10 km ronî kir. Karê komîteyê dewam dike heta ku kehrebe bigihîje taxa Meşleb û Muxtelîta ya li aliyê rojhilatê bajêr.

Gerînendeyê Komîteya Enerjî û Peywendiyan a Meclisa Sivîl a Reqayê Şêrko Keco wiha got: "Em kar dikin da ku xetên sereke û yên din ku hemû hatibûn rûxandin, sererast bikin. Karê me jî dewam dike heta ku hemû malên Reqayê ronî bibin."

(jo)

ANHA