Şaredariya Eyn Îsayê parkan sererast dike

GIRÊ SPÎ

Komîteya Xizmetguzariyê ji rêxistinên alîkariyê re ji bo sererastkirina 4 parkên bi navên şehîdan Îsmayîl El-Hemed, Umer bin El-Xetab, Taxa Rojava û parka Kaniyê hevkarî kir. Berî demekê komîteyê tevî derfetên kêm jî park ji keviran paqij kir, dîwar sererast kirin û boyax kirin.

Tê payîn ku sererastkirin 20 rojan bidome. Her wiha li parkê darên wekî sewlî (sero), şemsî (sîwan) û efes el-şerqî tên çandin, kursî û pêlîstokên zarokan jî lê tên danîn.

Lêçûna projeya sererastkirina parkan ji hêla rêxistinên alîkariyê Afaq Cedîde, IRC û Bilomend ve digihîje 16 hezar dolaran.

Hevserokê Komîteya Xizmetguzariyê ya navçeya Eyn Îsa, Nûr Emîn diyar kir ku ew van 4 parkan sererast dikin da ku bibe xweşikbûn û bêhnvedanek baş ji bo şêniyên navçeyê. Nûr Emîn wiha got: “Pêlîstokên zarokan dê wan ji qezayên li kolanan biparêzin.”

Zarokan spasiya Şaredariya Gel a navçeyê kir ji bo danîna lîstokan li parkê ya ku di demên vala de ji wan re dibe xemrevîn.

Navçeya Eyn Îsa ji herêmên çolistanê û bê şînkahî tê hesibandin, lewre ev projeya şaredariyê dê bibe xeml û xweşikbûna navçeyê.

(ekîb)

ANHA