Li Şehbayê nexweşiya laşmanya tê dermankirin

CAFER CAFO – ELÎ GEDRO / ŞEHBA

Ji ber şerê çend salan gund û bajarokên herêmên Şehbayê vala bûbûn. Piştî ku şêniyên Efrînê ji ber êrîşên artêşa Tirk a dagirker û çeteyên wê neçar man ku ji malên xwe derkevin û xwe li Şehbayê bi cih kirin, gelek nexweşî ji ber bermahiyên şer û xirabûna li wê derê di nava wan de derketin. Ji wan nexweşiyan yeke herî berbelav jî laşmanya ye.

Di vê çarçoveyê de Heyva Sor a Kurd dest bi hemleya dermankirina kesên ku bi vê nexweşiyê ketine, kir. Bernameya Heyva Sor a dermankirinê dê hefteyekê li navendên girêdayî Heyva Sor ên li herêmên Şehbayê dewam bike.

Endama Heyva Sor a Kurd Hêvîn Henan ji ajansa me ANHA`yê re got gelek şêniyên Efrînê ji ber bermahiyên şer ên çend salan li herêmê bi nexweşiya laşmanya ketine.

Hêvîn diyar kir ku ew wek Heyva Sor erka wan e ku dermanan ji kesên nexweş re peyda bikin lê ji ber herêm di nava ambargoyê de li pêşiyê bû asteng û derman hinekî dereng ji derveyî herêmê peyda kirin. Hêvîn destnîşan kir ku piştî wan derman peyda kirin û wan dest bi dermankirina kesên nexweş li tevahî herêmên Şehbayê kir. Her wiha Hêvîn diyar kir ku wan 4 nuqteyên tenduristiyê ji bo dermankirina kesên nexweş ji gund û kampên herêmê re diyar kirine.

Nuqteyên dermankirinê li Kampa Berxwedan, Kampa Serdem, navçeya Ehres û navçeya Til Rifet in. Kesên nexweş dikarin di hefteyê de du caran serdana nuqteyên dermankirinê bikin. Nuqteyên dermankirinê ji saet 08:00’an heta 02:00`yan vekirî ne. Di her nuqteyekê de hemşîreyek heye.

(bx)

ANHA