Meclisa Rêveber rewşa çandê nîqaş kir

Meclisa Rêveber a Rêveberiya Xweser a Bakur û Rojhilatê Sûriyeyê bi mebesta gotûbêjkirina warê çandê bi Desteya Çandê re civiya. Di civînê de ji bo amadekirina rêziknameyeke hevpar komîteyek hate avakirin.

19 mijdar, 2018 13:38

GIRÊ SPÎ

Civîn li avahiya Rêveberiya Xweser a Bakur û Rojhilatê Sûriyeyê ya li navçeya Eyn Îsa ya Girê Spî li dar ket. Hevserokên Meclisa Rêveber Bêrîvan Xalid û Ebdhamid El-Mihbaş û hevserokên deste û komîteyên çandê yên rêveberiyên xweser û sivîl ên herêmên Bakur û Rojhilatê Sûriyeyê di civînê de amade bûn.

Beşdaran rewşa çand û hunerê, deverên şûnwarî, her wiha çawaniya parastin û sererastkirina wan gotûbêj kirin. Di civînê de, her wiha mijara aktîfkirina deverên turîzmê li herêmên Bakur û Rojhilatê Sûriyeyê ku bibe jêdera aboriya herêmê, nîqaş kirin. Hate gotin ku divê çalakiyên çandî û hunerî bêne berfirehkirin.

Di dawiya civînê de ji bo amadekirina rêziknameyeke hevpar ji hemû deste û komîteyên çand û hunerê yên Bakur û Rojhilatê Sûriyeyê komîteyek ji 7 kesan hate avakirin.

Desteya Çand û Hunerê ya Rêveberiya Sivîl a Bakur û Rojhilatê Sûriyeyê li gel çand û hunerê qadên şûnwar û turîzmê jî dihewîne.

ANHA