Ji bo piştgiriya aboriya jinan, berhevkirina hilberîna zêdetirî 200 daran

UDEY EL-EHMED / TEBQA

Meclisa Jinan a gundê El-Sefsaf ji beriya salekê ve hatiye vekirin. Meclisê ji bo pêkanîna serxwebûna aboriya jinan û piştgiriya wê, 200 darên zeytûnê ku li qada meclisê hatibûn çandin ên ku ji ber dagirkirina DAIŞ û şerê li herêmê zuha bibûn, ji nû ve av da û sûd jê wergirt.

Beriya çend rojan meclisê dest bi berhevkirina hilberînê kir.

Têkildarî mijarê endama rêveber a Meclisa Jinan Sumeya El-Mihemed teqez kir ku darên zeytûnê gelek ziyan dîtibûn lê bi vekirina meclisê û wek gaveke destpêkê û lezgîn, bi çavdêriya pisporan meclisê darên zeytûnê av da, semad û derman lê reşandin.

Bi dagirkirina çeteyên DAIŞ'ê ya herêmê, stargeha şînatî hat paşguhkirin û bandoreke neyînî li rewşa herêmê kir û qadên şînkahiyê hatin kêmkirin. Para mezin a paşguhkirinê ya darên zeytûnê bû.

Bi armanca peydakirina rêgeza xwetêrkirinê ya aborî ji bo projeya Mala Mûnê ya ku beriya vê Meclisa Jinan a Tebqayê vekiribû, wê hilberîn radestî rêveberiya projeyê bike. Hilberîn wê dabeşî zeyt, zeytûna şîn, zeytûna reş (etûn) bibe û wê ji aliyê mala mûnê ve were firotin.

Hêjayî bibîrxistinê ye ku Meclisa Jinan a gundê Hinêde amadekariyên destpêkirina yekemîn projeya xwe di warê çandiniyê de di zivistanê de dike. Di projeyê de wê sebzeyên wekî xes bêne çandin.

(şx)

ANHA