‘Erka me ye ku em armancên şehîdan pêk bînin‘

HESEKÊ

Bi sedan şêniyên navçeya Şedadê cenazeyê şervanê YPG`ê Wesîm Abdullhelîm û şervanê QSD`ê Mihêsin El-Şelal ên ku di Şerê Tunekirina Terorê de li gundewarên Dêrazorê şehîd bûn, oxir kirin.

Şêniyan cenazeyên her dûu şehîdan ji Meclisa Malbatên Şehîdan a bajarê Hesekê wergirt û bi karwanekî ber bi Goristana Şehîdan a Şedadê ve ketin rê.

Merasîm bi rêzgirtinê dest pê kir, her wiha şervanên YPG`ê toreneke leşkerî li dar xis. Paşê ji fermandarên YPG`ê Hisên Hemadî axivî û sersaxî ji malbatên şehîdan re xwest û tekez kir ku pêngava dawîn a hemleya Bagera Cizîrê heta tunekirina çeteyên DAIŞ`ê li herêmê dê bidome.

Hemadî destnîşan kir ku şehîd ew in ên ku çirûska azadiyê pê xistin û xwe kirin mînak û ji ber wê pêwîst e heta dawiyê şopdarên rêya wan bin.

Paşê endama Saziya Malbatên Şehîdan Ayat Îbrahîm axivî û sersaxî ji malbatên her du şehîdan re xwest û destnîşan kir ku ew wek malbatên şehîdan amade ne ku her tiştê giranbuha bidin da ku herêm ji çeteyan were rizgarkirin û di bin sîwana Rêveberiya Xweseriya Demokratîk de bijîn.

Di dawiyê de wesîqeta her du şehîdan ji aliyê endama Saziya Malbatên Şehîdan Zehra Abdullah ve hate xwendin û radestî malbatên wan hatin kirin. Paşê cenazeyê her du şehîdan di nava dirûşmeyên dilsoziya bi şehîdan hatin oxirkirin.

(bx)

ANHA