Ji konferansa rêveberiya Şehbayê biryarên girîng

TOLÎN HESEN – FÎDAN ABDULLAH / ŞEHBA

Rêveberiya kantona Şehbayê bi dirûşmeya "Civaka birêxistinkirî civaka azad e" 3`yemîn konferansa xwe li gundê Til Qerah li dar xist.

Konferans du rojan berdewam kir. 150 delege ji saziyên sivîl, Yekitiya Jinên Azad a Şehbayê, meclis û komînên kantonê, rûspiyên êlan, Partiya Sûriyeyê ya Pêşerojê, Koalîsyona Neteweyî ya Demokratîk a Sûriyeyê, nûnerên Kongreya Star, Tevgera Civaka Demokatîk (TEV-DEM), Rêveberiya Xweseriya Demokratîk a Kantona Efrînê tev li konferansê bûn.

Konferansê bi rêzgirtinê dest pê kir. Paşê hevseroka Meclisa Damezirîner a Federaliya Demokratîk a Bakurê Sûriyeyê Hediya Yûsif û hevserokê Rêveberiya Demokratîk a Kantona Efrînê Osman Şêx Îsa rewşa dawîn a herêmê nirxand.

Di axaftinan de hate destnîşankirin ku hêzên ku li Sûriyeyê di nava çend salên borî de şer dikin, dixwazin komployên xwe yên dagirkeriyê pêk bînin û desthilatdariya xwe li ser gel ferz bikin.

Her wiha hate gotin ku êrîşên ku li ser Rojava û Bakurê Sûriyeyê pêk tên armanca wan e ku projeya demokratîk a herêmê têk bibin.

Paşê rapora kar û xebatên salekê ji aliyê cîgirê Hevserokatiya Rêveberiya Meclisa Kantona Şehbayê Îsmaîl Mûsa ve hate xwendin.

Biryarên ku di konferansê de hatin dayîn

Piştî nîqaşan û ji bo pêşxistina asta kantona Şehbayê di hemû aliyan de gelek biryar hatin dayîn:

1-Careke din hevserokatiya komînan di ber çavan re were derbaskirin, li gorî pêwîstiyê komîn li gundan werin avakirin û komîteyên di meclisan de werin xurtkirin.

2-Dewreyên perwerdeyê yên rêxistinî ji bo karê saziyan, her wiha perwerdeyên bîrdozî werin vekirin.

3-Komîteya Têkiliyên Diplomatîk li herêmê were vekirin da ku rewşa girtiyan û kesên winda bişopîne.

4-Komîteya Zimhêrê were avakirin.

5-Komîtaya mafên mirovan li herêma Şehbayê were avakirin û careke din dîwana dada civakî were avakirin.

6-Di aliyê madî û moraldayînê de alîkariya hêzên berxwedana gelêrî bikin ku li dijî dagirkeriya Tirkiyeyê şer dikin û Efrîn rizgar bikin.

7-Xwedîderketina li biryarên konferansa Yekitiya Jinên Azad û konferansa Meclisa Malbatên Şehîdan.

8-Di aliyê madî û moraldayînê de alîkariyê bidin ciwanan da ku xwe li kantona Şehbayê bi rêxistin bikin.

9-Alîkariyê bidin saziyên xweparastinê da ku aramî û ewlehiyê ji gel re peyda bikin.

10-Rola Komîteya Perwerdeya Civaka Demokratîk li kantonê xurt bikin û rola çapemeniyê aktîf bikin.

11-Ji bo birêxistinkirina bajarên Til Eran, Til Hasil û gundên wê di hemû aliyan de komîteyek were avakirin.

12-Asta têkoşînê were xurtkirin û hemû çalakî dê di çarçoveya pêkanîna pîvanên neteweya demokratîk û rizgarkirina Rêberê Gelê Kurd Abdullah Ocalan dê werin lidarxistin.

Di dawiya konferansê de ji rêveberên TEV-DEM`ê Hesen Koçber axivî û destnîşan kir ku Sûriye di rewşeke hesas re derbas dibe, pêwîst e gelên Bakurê Sûriyeyê û Rojava bi awayekî mezintir cihê xwe di nava civakê de bigirin û tev li hemû partiyên siyasî bibin, yekitiya xwe li dijî dagirkeriya Tirkiyeyê ava bikin da ku hemû planên navdewletî yên li dijî civaka demokratîk têk bibin.

(bx)

ANHA