Şehîd Evîn Tolhildan hate oxirkirin

QAMIŞLO

Bi hezaran şêniyên herêma Dêrikê û navçeyên wê li ber Nexweşxaneya Şehîd Hogir a bajarê Dêrikê di destê wan de wêneyên şehîdan, wêneyên Rêbeberê Gelê Kurd Abdullah Ocalan, al û sembolên kurdî kom bûn. Şêniyan cenazeyê şervana YPJ`ê Evîn Tolhildan ku di şerê Til Elo de birîndar bûbû û di encama birîna xwe de di 20`ê Îlonê de li  nexweşxaneyeke başûrê Kurditanê de şehîd bûbû, wergirt. 

Bi hezaran şêniyên Dêrikê bi hemû pêkhateyên xwe, endamên saziyên sivîl û partiyên siyasî tev li merasîmê bûn.

Cenazeyê şehîd bi karwanekî ber bi Goristana Şehîd Xebat Dêrik a bajarê Dêrikê ve ket rê.

Merasîmê bi rêzgirtinê dest pê kir. Her wiha toreneke leşkerî ji aliyê şervanên YPJ û endamên Erka Xweparastinê ve hate lidarxistin. Paşê ji fermandar YPJ`ê Kurdistan Xêrkî axivî û sersaxî ji malbata şehîd re xwest û soz da ku dê her tim şopdarên rêya şehîdan bin.

Kurdistan di axaftina xwe de destnîşan kir ku di destpêka şoreşa Rojava de fermandar Evîn ew perwerde kirin û dê heta serkeftinê şopdarên rêya wan bin.

Kurdistan diyar kir ku şehîd Evîn ji Dêrikê heta Efrînê cihê xwe di eniyên şer de digirt û wiha pê de çû: "Ji hemû laşê xwe birîndar bûbû. Lê îradeya wê xurt bû. Tu car teslîm nebû. Têkoşîna xwe berdewam kir û di oxira wê de gihaşt asta şehadetê."

Paşê hevserokê Meclisa Malbatên Şehîdan a Kantona Qamişlo Hesen Ebîd axivî û sersaxî ji malbata şehîd re xwest. Ebîd di axaftina xwe de diyar kir ku şehîd Evîn efsaneya serdemê ye û bê teredud cihê xwe di eniyên pêş de di hemû şeran de digirt.

Paşê wesîqeta şehadetê hate xwendin û radestî malbata wê hate kirin.

Ji aliyê xwe malbata şehîd Evîn jî soz da ku dê her tim şopdarên rêya şehîdan bin û heta ku tevahî axa bakur û rojhilatê Sûriyeyê ji çeteyan were rizgarkirin dê têkoşîna xwe berdewam bikin.

Di dawiyê de cenazeyê şehîd Evîn di nava dirûşme û tilîliyan de hate oxirkirin.

(bx)

ANHA