Parka El-Kesra zarokên Dêrazorê hembêz dike

HEMED EL-MISTEFA - FEDÎ EL-FARÛQ / DÊRAZOR

Îsal rengekî xwe yê taybet heye. Şêniyên Dêrazorê piştî derbasbûna 7 salên dagirkeriyê ji aliyê DAIŞ'ê ve, ji nû ve rûyê wan piştî rizgarkirina QSD'ê geş bû.

Kameraya ajansa me li navçeya El-Kesra geriya û tevgera zarokan di nav parka navçeyê de şopand. Li parkê yarî û lîstokên hêsan hatine danîn. Ken li ser rûyê zarokan naçe.

Bêyî çavdêrî û berpirsek ku nefesa wan qut bike û bêyî aliyekî ku hewl dide fikra xwe di serê wan zarokan de biçîne, zarok dilîzin û heta çavên wan dikenin. Ev tişt bi saya serkeftinên QSD'ê pêk hat û aramî û ewlehî li herêmê bi cih anî.

Têkildarî mijarê zaroka bi navê Xedîce wiha got: "Me nizanî lîstokên çi ne, em hin lîstokên din dixwazin. Li gel me ajnegeh, lîstokgeh tune ne. Em stadyûma keç û xortan dixwazin."

Her wiha zaroka du salî bi navê Henîn kêfxweşiya xwe bi peyvên zaroktî anî ziman û got: "Lîstok pir xweş in, ez dixwazim bilîzim."

Dayika zarokekî ya bi navê Sebîhe wiha axivî: "Zarok ji hemû tiştên xwe yên zaroktiyê bê par mabûn. Xwestin demên xwe dagirin lê beyî ku nas bikin ka çi rast e yan şaş e. Lê bi hebûna lîstokan em bi aramiyê hesiyan." Her wiha Sebîhe hêvî kir bernameya parkan ji vê bêtir bi pêş bikeve û gelek beşên din wekî ajnegeh û stadyûm vebin.

Hêjayî bibîrxistinê ye ku Rêxistina Concorn lîstok pêşkeş kirin û bi hevkariya komîte û şaredariyên ên saziyên xedemî yên Meclisa Sivîl a Reqayê heta temamkirina jinûveavakirina binesaziya hemû beşên Dêrazorê xebatê dişopîne.

(şx)

ANHA